Álemdik qarjy daǵdarysy údegen tusta kásipkerlerdiń keıbiri daǵdaryp qaldy.

Biraq ilimin bilgen árdaıym ilgeri basady. Aqtóbede «Bıznestiń jol kartasy – 2020», «Damý-Óndiris» baǵdarlamalaryna júginip, kásipti kórkeıtýge múmkindik alǵan kásipkerler qatary artty. Solardyń birqataryna «Damý» qorynyń Aqtóbe oblystyq fılıaly pres týr uıymdastyrdy. Bul týraly Qamshy portaly Aıqynǵa silteme jasap, habarlaıdy.
Aqtóbede túrli sýsyndardan qalǵan plas­­tıkalyq bótelkelerden óndiriske qa­jetti lenta shyǵaryla bastady. Bul – Ba­tys Qazaqstan aýmaǵynda teńdesi joq seh. Ádet­tegi sýsynnyń bótelkeleri endi óndi­ris­ke jarady. Býyp-túıýge arnalǵan lenta plasıkalyq qaldyqtan jasalady. Qazan­dyqta qaınap, keıin salqyn sý quıylǵan ydys­qa túsetin plasık lentanyń qazir táý­ligine 280 myń metri shyǵarylyp ja­-tyr. Al sehtyń táýligine 600 myń metr len­ta shyǵarýǵa múmkindigi bar. Tózimdi plas­tıkalyq lentalar iri kirpish, gazbloktaryn shyǵaratyn sehqa qajet. «Jasyl tústi len­ta «Spraıt», aq tústisi «Tan», al ashyq tústi lenta mıneraldy sý bótelkesinen alynǵan. Plasıkalyq qaldyqty jergilikti kásip­ker­ler jetkizedi. Biz daıyn ónim shyǵa­ra­myz. Kásiporyndy ashýǵa «Damý» qorynyń oblystyq fılıaly kómektesti. Endigi maqsat – Reseıdiń shekaralas oblystaryna shyǵyp, kórshi eldiń tapsyrysyn qabyl­daý» deıdi kásipker Áltaır Luqmanov. 
«Damý» qorynyń Aqtóbe oblysy bo­ıynsha aımaqtyq fılıalynyń bas mened­jeri Álibı Sabyrdyń aıtýynsha, «Bız­nes­tiń jol kartasy – 2020» baǵdarlamasy iske qosylǵan sátten bastap oblystaǵy 453 jo­ba­ǵa 50 mıllıard teńgeden astam qarjy bó­lingen. Al 103 jobany sýbsıdıalaýǵa 
4,2 mıllıard teńge jumsaldy. Negizinen, jer­gilikti kásipkerler kóbine qyzmet kór­setý, óńdeý salasyna qajetti kómek alyp ke­ledi. Óńirde jol boıyna kempıng salýdy maqsat etken kásipkerler qatary da artqan. 
Memlekettik qoldaýǵa jolaýshylar ta­symaldaıtyn poıyzdardyń tósek-ornyn jýyp, útiktep, arnaıy selofanǵa salyp beretin «Istochnık» JSHS-i de ıe boldy. Qazir iri oqý oryndary men áskerı bólim­derge de qyzmet kórsete bastady. 
Jolaýshylardyń jaıly tósek-ornyn qamtamasyz etetin kásiporyn on jyl boıy tek kir jýýmen aınalysty. Bıyl qyzmet kórsetý aıasy keńidi. Endi «Istochnık» JSHS-i poıyzdyń tósek-ornyn jabdyq­taıdy. «Qyzmet kórsetý aýqymy keńeıgen kezde «Damý» qorynyń oblystyq fılıa­lyna júgindik. Munda bizge ekinshi deńgeıli bankten alǵan nesıeni sýbsıdıalaýǵa múm­kindik berildi. Sóıtip, 80 mıllıon teńge sýbsıdıalanyp, 14 paıyzdyń teń jartysyn memleket tóledi. Nesıeni kepildendirýge memleket taǵy 6,2 mıllıon teńge berdi»  deı­di kásiporyn dırektory Bolatbek Baı­janov. Qarjyǵa Reseıden jyly kórpe, Qy­taıdan jamylǵy alyndy. Al matrasty qazaqstandyq kásiporyn jasap shyǵarǵan. «Istochnık» JSHS-nyń dırektory Bolat­bek Baıjanovtyń aıtýynsha, aldaǵy ýaqyt­ta tósek-oryn jabdyqtary túgel osy jerde shy­ǵarylady. Ol úshin tigin sehyn ashý jos­parda bar. 
Kásiporynda 90 adam eńbek etedi. Qyz­met aıasyn keńeıtken kezde 25 adamdy jumysqa alǵan. 12 jyldan beri tósek-oryn jýyp, útiktep, daıyndap kele jatqan Dá­meli Jekeevanyń aıtýynsha, sońǵy jyl­dary jumys jeńildedi. Mundaǵy kir jýatyn mashınalar Germanıa, Chehıa, Reseıden shy­ǵa­rylǵan. Bir mezette bir kir jýý ma­shı­nasyna 100 keli tósek jabdyǵy salynady. Kásiporynda táýligine 5 tonna tósek jab­dyǵy jýylady. 2005 jyldan beri munda 17,5 mıllıon tósek jabdyǵy tazalandy. 
Aqtóbede «Damý-Óndiris» memlekettik baǵdarlamasyna júgingen kásiporyn da bar. Gaz bloktaryn shyǵaryp, jıhaz jasaıtyn kásiporyn memlekettik baǵdarlama boıyn­sha 12 mıllıon teńgeni 6 paıyzdyq ústeme aqymen aldy. Qarjyǵa qajetti qural-jab­dyq pen kólik satyp alyp, óndiris ornyn­daǵy jumysty jandandyrdy. Sonymen qatar «ÝkrTorgStroı» JSHS-y osy baǵ­darlama boıynsha memlekettik kepildikke ıe boldy. «Biz buǵan deıin tek tósegish qu­rylys materıaldaryn óndirýmen aınaly­syp keldik. Keıin qurylys salasyna tú­be­geıli bet buryp, gaz bloktardy shyǵarýdy qolǵa aldyq. Nátıjesi ońdy. Memlekettik baǵdarlama arqyly óndiris ornyndaǵy ju­mys eselenip, taýar satyla bastady. Je­ke tulǵalar tapsyrys berip jatyr. Al­daǵy ýaqytta iri kásiporyndardan tapsyrys alý­dy josparlap otyrmyz» deıdi kásiporyn dırektory Qadyr Baıtóbetov. Qazirgi kúni kúnine 18-20 tekshe gazblok shyǵarylady. Alǵashqy kezde óndiriste tek 6 adam jumys istep júr. «Básekelestikten qorqyp, bos otyrýǵa bolmaıdy. Kez kelgen taýardyń óz tutynýshysy bar. Sóıtip, kásiporyn da na­ryqta óz ornyn tabatynyna senimdimiz» deı­di Q.Baıtóbetov. 
Negizinen, «Damý-Óndiris» – óńdeýshi ónerkásip salasyndaǵy jeke kásipkerlik sý­bektilerin qoldaý baǵdarlamasy. Baǵ­darlama arqyly tamaq, toqyma, sýsyndar óndirý, kıim tigý, jıhaz jasaý, hı­mıa óner­kásibi, negizgi farmasevtıkalyq ónimder men preparattar óndirý jáne taǵy da basqa salany damytýǵa bolady. Qarjy­ny «Báı­terek Dekeloment» AQ-y ekinshi deńgeıli bankterge saldy. Sol arqyly bız­nesti qar­jylandyrý, qaıta qarjylan­dy­rýǵa múm­kindik berilgen.