Ortalyq Azıa elderi Aral teńizi men Semeı ıadrolyq synaq polıgonynyń ekologıalyq problemalarymen kúreste kómek kútedi. Búgin  BUU Bas Assambleıasynyń 70-shi mereıtoılyq sesıasy aıasyndaǵy «Post-2015» samıtinde sóz sóılegen Elbasy Nursultan Nazarbaev osylaı dedi. Bul týraly Qamshy portaly Inform.kz-ke silteme jasaı otyryp habarlaıdy.

«Qazaqstan myńjyldyqty damytý maqsattary men mindetterin oryndaýda jaqsy jumys istedi.  Búgingi kúni atqarylǵan jumystar jaıynda aıtýǵa bolady.  Birinshiden, biz memlekettilik negizin nyǵaıttyq, azamattyq qoǵam damýy úshin jaǵdaı jasadyq. Ekinshiden, eldiń JİÓ-si 19 ese ósip, bizdiń halqymyzdyń jan basyna shaqqandaǵy tabysymyz 13 myń AQSH dollaryna jetti. Úshinshiden, qazaqstandyqtardyń ómir súrý uzaqtyǵy 71 jastan asyp jyǵylady. Kedeıshilik deńgeıi 34-ten 4 paıyzǵa,  11 esege tómendedi. Ana men bala ólim-jitimi deńgeıi 65 paıyzǵa azaıdy. Biz JITS, bezgek, týberkýlez syndy aýrýlarmen kúreste aıtarlyqtaı nátıjege qol jetkizdik», - dedi Memleket basshysy.

QR Prezıdenti  tórtinshiden, Qazaqstan parnıkti gazdar shyǵaryndylaryn qysqartyp, ǵalamsharymyzdyń bıologıalyq alýantúrliligin saqtaý úshin qamqorlyq jasap otyrǵandyǵyn basa atap ótti.

«Bizder «Jasyl ekonomıkaǵa» kóshý tujyrymdamasyn bekittik. Joǵalyp bara jatqan Aral teńiziniń problemasy tek bizdiń óńirge ǵana emes, sonymen birge búkil álemge qaýip tóndirýde. Onyń tartylýy saldarynan jyl saıyn 75 mln. tonnaǵa deıingi shań-tozań men ýly tuzdy jel áýege kóterýde. Búginde olar Eýropada, tipti Antarıktıda da tabylýda. Dúnıejúzilik banktiń qoldaýymen bizder Aral teńiziniń soltústik bóligin qalpyna keltire aldyq», - dedi N.Nazarbaev.

Sonymen qatar Elbasy Qazaqstan BUU-men jáne halyqaralyq qoǵamdastyqpen burynǵy Semeı ıadrolyq polıgony aımaǵyn qalpyna keltirýde belsendi yntymaqtasa jumys istep kele jatqanyn atap ótti.

«Ortalyq Azıa elderi óńirdiń atalǵan ekologıalyq problemalarymen kúresý úshin kómek kútedi», - dedi QR Prezıdenti.