«AMANAT» partıasynyń atqarýshy hatshysy Elnur Beısenbaev májilis jáne máslıhat depýtattyǵyna partıa atynan usynylatyn úmitkerlerdi irikteý jumysy bastalǵanyn jarıalady. Ol bul týraly óziniń Facebook jelisindegi paraqshasynda arnaıy jazba jarıalady.

«Keshe Májilis jáne máslıhat depýtattyǵyna partıa atynan usynylatyn úmitkerlerdi irikteý jumysy bastaldy. Ózderińiz bilesizder, resmı tirkelgen 7 partıanyń ishinde tek «AMANAT» partıasynyń el aýmaǵyndaǵy árbir aýdanda óz fılıaly bar, qazirgi tańda olardyń sany – 249. Budan bólek, elimizdiń túkpir-túkpirindegi partıalastardyń basyn biriktiretin 4 myńǵa jýyq bastaýysh uıymdarymyzda 800 myńnan astam múshemiz bar. Májilistegi 98 depýtattyń 69-y – partıalyq tizim arqyly, 29-y – bir mandatty okrýgterden saılanady. El aýmaǵyndaǵy 223 máslıhatqa barlyǵy 3415 depýtat saılanýy tıis», – dedi E.Beısenbaev.

Onyń aıtýynsha, partıa májilis jáne barlyq deńgeıdegi máslıhattarǵa shynaıy báseke jaǵdaıynda myqty úmitkerlerdi usynady. Sondaı-aq atqarýshy hatshy «AMANAT» partıasynyń jańa quramdaǵy depýtaty qandaı bolýy kerek ekenin aıtty.

«Halyqpen tikeleı jumys istep, ult múddesin bárinen joǵary qoıatyn bilikti azamat bolýy tıis. Sondyqtan partıanyń úmitkerleri – qolynan is keletin, elge qyzmet etem deıtin partıalastardyń arasynan ádil tańdalady» – dedi ol.

Qazirgi tańda jer-jerdegi bastaýysh partıa uıymdary aldaǵy kúnderi ótetin partıanyń aımaqtyq konferensıalaryna óz delegattaryn irikteýdi bastap ketken. Delegattar konferensıada partıa atynan máslıhat saılaýyna qatysatyn úmitkerler tizimin jasap, bekitedi. Dál osy tártippen oblystyq máslıhat depýtattyǵyna úmitkerler tizimi de bekitiledi.

Sonymen qatar, Elnur Beısenbaev bir mandatty úmitkerlerdiń jáne partıalyq tizimdi jasaýdyń ashyq ótýine basa nazar aýdardy. Ol kandıdattardy irikteýdegi «AMANAT» partıasynyń basty ustanymdaryna toqtaldy.

«Ókilettilik jáne ashyqtyq, ádildik jáne jańarý. Partıa úshin eń bastysy, úmitkerler qoǵam suranysyna saı, halyq talabyna jaýap beretin azamattar bolýy tıis. Partıalyq tizim arqyly bolsyn nemese bir mandatty okrýg arqyly bolsyn, saılaýǵa túskisi keletin úmitkerler eń áýeli óz isiniń mamany bolýy kerek. Qoǵamnyń úni bolyp, halyq múddesine jumys isteý úshin belgili bir bilim men tájirıbe kerek. Biz ádil irikteý jasaımyz: haıp izdegenderdi emes, halyq amanatyna adal jumys isteıtin azamattardy qoldaımyz. Biz kúshimizge senimdimiz, tartysty básekege tas-túıin daıynbyz», – dedi atqarýshy hatshy.