Qostanaı oblystyq Memlekettik kirister departamenti Reseıge áskerı shlemder men taktıkalyq rúkzaktardy alyp ótpek bolǵan kólik júrgizýshisi ustalǵanyn habarlady. Ol "Qaıraq" avtomobıl ótkizý pýnkti arqyly ótpek bolǵan.
"Qostanaı oblystyq Memlekettik kirister departamenti men UQK Shekara qyzmetiniń birlesken áreketimen «Gazel» markaly kóliktiń júk bóliginen áskerı shlemder men taktıkalyq rúkzaktar tabyldy. Tasymaldaý muqaba taýarlaryn qoldana otyryp júzege asyrylǵan. Taýarlarǵa ilespe qujattamada taýarlar týraly málimetter joq. Júgi bar kólik ótkizý pýnktiniń aýmaǵynda bolady. Taýarlardyń shyǵý tegin jáne áketýge qatysy bar tulǵalardy anyqtaý boıynsha sharalar qabyldanady", - delingen habarlamada.
Departament dereginshe, mán-jaılar anyqtalǵan soń, bul áreketke qatysy bar adamdar jaýapqa tartylyp, júk memleket paıdasyna tárkilenedi.
