Fransıa apelásıalyq sotynyń qazaqstandyq bankır Muhtar Áblázovqa qatysty sot talqylaýyn toqtatý týraly sheshimin eldiń Kasasıalyq soty jaramsyz dep tanydy. Áblázovqa aqsha jymqyrdy degen aıyp qaıta taǵyldy, dep habarlady mediapart aqparattyq portaly.

Kasasıalyq sot Parıj apelásıalyq sotynyń tergeý palatasy 2022 jyldyń 13 qańtarynda qabyldaǵan sheshimniń barlyq tarmaqtary joıylǵanyn jáne isti qaıta qaraýdy talap etetindigin atap ótti.

Eske sala keteıik, Qazaqstanda Muhtar Áblázov BTA bankinen 7,5 mlrd dollar qarjy urlap, qylmystyq qoǵamdastyq qurǵany úshin kináli dep tanylǵan bolatyn.

Sonymen qatar, ol elimizde ekstremıstik uıym dep tanylǵan  "Qazaqstannyń demokratıalyq tańdaýy" tirkelmegen qozǵalysynyń kóshbasshysy.

Buǵan deıin bas prokýrordyń orynbasary Áset Shyndalıev Muhtar Áblázovty nege ekstradısıalaı almaıtynyn aıtqan bolatyn. Onyń aıtýynsha, ekstradısıalaý úshin Fransıamen tıisti shart bolmaǵan.