Búgingi jahandaný zamanynda ǵylym men tehnologıanyń qaryshtap damyp, altyn basty azamattaryna ár el ınvestısıa quıyp jatqanda bizdiń memleketimiz de qalys qalyp, kósh sońynda qalmaýy tıis ekeni beseneden belgili. Osy rette prezıdentimiz Qasym-Jomart Toqaev úkimet basyndaǵylarǵa asa mańyzdy  tapsyrma berip,  sol tapsyrmaǵa sáıkes elimizde 2021-2025 jyldarǵa arnalǵan «Bilimdi ult» sapaly bilim berý» Ulttyq jobasy ázirlengen bolatyn. Qazirgi ýaqytta joba sátti iske asyp jatyr.

Jobanyń maqsaty bilim sapasyn kóterý, bilim berý nysandaryn salý, bilimge qoljetimdilikti arttyryp, osy salany sıfrlandyrýdy qolǵa alý jáne balalardyń oqýy úshin qolaıly jaǵdaı jasaý sıaqty túrli máselelerdi sheshýge baǵyttalǵan.

Joba aıasynda 2025 jylǵa qaraı Bilim berý salasy boıynsha negizgi kapıtalǵa ınvestısıa 174,8 paıyzǵa ósip, bilim berý salasynda 5 mln teńgege jýyq qarajat JQQ-ǵa jumsalyp, 104 myńǵa jýyq bilim berý salasynda jańa jumys oryndary ashylmaq eken. Jalpy «Bilimdi ult» sapaly bilim berý» Ulttyq jobasynyń iske asýyna 2 mlrd teńge bólinip otyr eken.  Qazirgi ǵylym men tehnologıanyń zamanynda bilim berý salasyna qansha qarajat quısań da artyq etpesi anyq.

«Bilimdi ult» sapaly bilim berý» Ulttyq jobasy aıasynda árıne Astana qalasynda da aıtarlyqtaı eleýli jumystar atqaryp jatyr. Qala elimizdegi negizgi qala, ıaǵnı memleket astanasyna aınalǵaly halyqtyń sanymen birge oqý oryndarynyń da sany artyp, sáıkesinshe sheshilýi tıis máseleler de artty. Astananyń kólemi birneshe ese úlkeıip,  turǵynúıler ústi-ústine salynyp jatyr.

Osy rette bıylǵy oqý jylynda qalada jańadan 9 mektep esigin bilim alýshy balalarǵa tuńǵysh ret aıqara ashqanyn aıta ketý kerek. Olardy atap aıtsaq, Rysqulov kóshesindegi, R.Qoshqarbaev dańǵylyndaǵy jáne Uly Dala dańǵyly men Saýran kóshesiniń qıylysyndaǵy, Uly Dala dańǵyly men №39 kósheniń qıylysyndaǵy jáne t.b. mektepter.

Aldaǵy oqý jylynda qalada 2 aýysymda taǵy 13 mektep salyný josparlanǵan eken. Bul mektepterdiń ár biri 4 myń oqýshy oqytyp shyǵara alady.  Qalada mektepter sany artyp qana qoımaı, jaǵdaı da jasalyp jatyr. Oqý oryndarynyń mańaıyna aǵash, gúl otyrǵyzylyp, tıisinshe abattandyrý jumystary júrgizilip jatqan kórinedi.

Taǵy bir aıta ketetin jaǵymdy jańalyq, jaqynda Astana qalasynda mektep oqýshylaryn kitapqa baýlý maqsatynda sabaq aldynda «8 mınýt kitap oqý» bastamasy júzege asa bastaǵan bolatyn. Iaǵnı oqýshylar kúndelikti mektepke 8 mınýt erte kelip, ózderi unatatyn kórkem ádebıet oqıdy. Shara oqý jylynyń ekinshi toqsanynan bastalǵan. Astana qalasy Bilim basqarmasynyń basshysy Qasymhan Senǵazyevtiń aıtýynsha bul shara oqýshylardyń kitapqa qyzyǵýshylyǵyn arttyrady.

«Bul jobany bastaýdaǵy maqsatymyz árbir oqýshy kórkem ádebıet oqysa eken deımiz. Sebebi, kitap oqyǵan oqýshynyń bilimi, oı-órisi keńeıedi. Kitap oqýdyń paıdasy orasan zor. Sózdik qordyń kóbeıýine, mıdyń kúndelikti jattyǵýyna jáne este saqtaý qabiletiniń jetilip, balanyń shyǵarmashylyq oılaý júıesin jaqsartady. Odan ózge bilim sapasyn kóterýge tıgizer áseri mol. Sol sebepti osy jobany oılap taýyp, mektepterge engizip otyrmyz», – deıdi Qasymhan Senǵazyev.

Sondaı-aq, mektepterde «Býkkrosıng» buryshtary ashylyp, onda oqýshylar bir-birimen kitap almasa bastady. Mektepterdiń foıelerinde oqýshylarǵa arnalǵan kovorkıng zonalar da bar. Osyndaı ıgi bastamalardyń arqasynda bas qalamyz bilim qalasyna aınalyp, saýatty da sanaly urpaq tárbıeleý ústinde ekenin basa aıtqymyz keledi.