Qala tazalyǵyna jaýapty komýnaldyq qyzmetkerlerdiń eńbegi erekshe. Olar kúndiz de, túnde de, kez kelgen aýa raıynda jumysyn toqtatpaıdy. Olardyń qajyrly ári jaýapty jumysynyń arqasynda qalada tártip pen tazalyq saqtalady. Komýnaldyq qyzmetkerler turǵyndarǵa qolaıly jaǵdaı jasaý úshin jumys isteıdi.

«Astana tazalyq» kásipornynda qazirgi kúni 1848 adam jumys istese, qysqa qaraı olardyń sany kóbeıedi, sebebi qar tazalaý jumysy kóp adam kúshin qajet etedi. Mekeme qyzmetkerleriniń ishinde Aýǵan soǵysynyń ardageri jáne Chernobyl apatynyń zardabyn joıýǵa qatysqan 12 azamat eńbek etedi eken. Sonyń biri – Beısembek Narynov.

Aýǵan soǵysyna kútpegen jerden baryp, eki jyl maıdanda bolǵan Beısembek aǵa osy tazalyqqa jaýapty mekemede jumys isteıdi. Ózi – Astana qalasynyń týmasy. Qorǵaljynda ósken. Sol jaqtan áskerge ketip, 1979-1981 jyldary oralǵan. Aýǵanstandaǵy soǵys kezinde birneshe qalasyna kirip, áskerı qımyldarǵa qatysty, talaı ret ajal aýzynan aman qaldy.

Beısembek Narynov «Astana tazalyq» seriktestigine 2001 jyly kelgende mashınıst bolǵan. Sodan beri bir mekemede taban aýdarmaı eńbek etip keledi, qazirgi kúni jastarǵa kórgen-bilgenin úıretken ol – ujymda syıly, qurmetti jan, eńbek ardageri.

– Qysy-jazy buzylyp, isten shyqqan tehnıkalardy jóndeımin. Ystyqta-salqynda temir-tersek arasynda júrip jumys isteý, árıne, ońaı emes. Biraq jastaıymnan eńbektenip, qara jumysqa erte beıimdelgendikten, qandaı sharýa bolsa da tartynbaı jasaımyn. Qala tazalyǵyna kerekti tehnıka jıi jóndeýdi, synǵanyn ońdaýdy qajet etedi. Kómekshim kerek temirlerdi, qosalqy bólshekterdi áperip tursa, jóndeý jumysyna alańdamaı kirisemin. Eskisin jóndeımin nemese qaıta qurastyramyz, áıteýir jumysy kóp, beıneti jetip artylatyn, biraq ujymdastar arasynda qadirli kásip qoı slesar degen, oǵan jastar arasynan keletinder tym az. Biz sekildi júrmeıdi, olar tez aqsha tabatyn kásipti meńgergisi keledi. Osy qynjyltady meni, – deıdi naǵyz eńbek adamy Beısembek Qarabaıuly.

Kólikterdi, tehnıkalardy jóndeý jónindegi slesar – bul tehnıkalyq qyzmet kórsetip, bólshekteýdi, jóndeýdi, aýystyrýdy, dánekerleýdi, jınaýdy jáne retteýdi júrgizetin maman. Slesardiń mindetine avtomobılderge tehnıkalyq qyzmet kórsetý jáne ony jóndeý, eńbekti qorǵaý, qaýipsizdik tehnıkasy men órtten qorǵaý erejeleriniń saqtalýyn baqylaý, paıdalaný materıal­darynyń shyǵynyn esepke alý kiredi. Ol fızıkalyq tózimdiligi men kúshi aıryqsha, shıraq, tehnıkalyq ıntellekt, zeıindi, baıqampaz, shydamdy, jaýapkershiligi joǵary, apat dabyldaryna tez jaýap beretin kásibı maman bolýy tıis. Bul rette slesar kásibiniń qyr-syryn meńgerip, jastardy úıretýden jalyqpaǵan Beısembek Narynov sekildi eńbek ardagerin atap ótý oryndy.

Shynynda da, qalanyń qym-qýyt tirshiliginde elorda turǵyndaryna qolaıly jaǵdaı jasaý úshin jumys istep jatqan komýnaldyq qyzmetkerler eńbegi qandaı da bir qoldaýǵa laıyq.