Zańnamaǵa tótenshe jaǵdaılardy joıýǵa qatysatyn eriktilerdi saqtandyrýǵa qatysty ózgerister engiziledi. Bul týraly ulttyq volonterlik jeliniń tóraǵasy Vera Kım málimdedi, Habar 24 arnasy.
Qazirgi josparǵa sáıkes, eriktiler aldymen oqytý kýrstarynan ótedi. Sonyń nátıjesinde arnaıy kýálik alady. Odan keıin tótenshe jaǵdaılar mınıstrligine tirkeýge turady. Osylaısha, memleket tarapynan tıisti saqtandyrý alýǵa múmkindik bolady.
"Ókinishke qaraı, biz eriktiler qyzmetine arnalǵan zańǵa barlyq bastamalarymyzdy engize almadyq. Aldaǵy ýaqytta tótenshe jaǵdaılardy joıýǵa atsalysatyn eriktilerdiń ómirin saqtandyrýǵa arnalǵan normany engizýdi josparlap otyrmyz", - deıdi Kım.
Ulttyq volonterlik jeli tótenshe jaǵdaılar mınıstrligimen memorandým da rásimdep úlgerdi. Týra sondaı yntymaqtastyq densaýlyq jáne ishki ister organdarymen de jasalady. Árbir vedomstvo óziniń eriktiler bazasyn júrgizedi.
Búginde eriktiler elde bolǵan apattarda, habar-osharsyz ketken adamdardy izdeýde belsendilik tanytyp jatyr. Osyndaı qıyn qystaý sátte eriktiler óz ómirlerine qaýip tónse de, kómekke keledi. Sondyqtan volonterlerdi de jan-jaqty qorǵaý kerek. Bul bastamany qazir júzege asyrý múmkin bolmaı tur. Sebebi elde tótenshe jaǵdaılar kezinde naqty jumys isteı alatyn volonterlerdiń sanyn anyqtaý qıynǵa soǵýda.
Aıta keteri, Qazaqstanda eriktilerdiń jalpy sany 240 myń adamnan asady.
Pikir qaldyrý