Búgingi kúni Qazaqstanda óńirlerdi damytý boıynsha qarqyndy jumystar júrip jatyr. Ásirese Astana qalasynda kózge kóriner aýqymdy jumystar jeterlik.

Onyń ishinde turǵyn úı qurylysy, jylý men elektormen jabdyqtaý, turǵyn úı — komýnaldyq sharýashylyq uıymdaryn jetildirý men kólik-logıstıkalyq áleýetin nyǵaıtý jáne jańa óndiristik kásiporyndardy iske qosýǵa qatysty birqatar jumystar atqarylýda.

QR Prezıdenti Qasym-Jomart Toqaevtyń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasynda: «Memleket jańa turǵyn úıler salady, barlyq óńirdegi jergilikti ınfraqurylym men ınjenerlik komýnıkasıalardy jańartady. Biz sapaly jumys ornyn qamtamasyz etemiz, ár azamattyń ózin damytýyna teń múmkindik jasaımyz. Munyń bári óńirlerdi turǵyndar men ınvestısıalar úshin tartymdy etedi», — degen bolatyn.

Búgingi tańda prezıdenttiń tapsyrmasyn buljytpaı oryndap, halyqty jaıly turmys, qońdy ál-aýqatpen qamtamasyz etý maqsatynda Astana tarapynan da birshama jumystar atqarylyp, óńirdiń damýyna eleýli úles te qosylyp jatyr.

Elorda ákimdiginiń resmı saıty jazǵandaı: «Bul baǵdarlamanyń maqsaty – bazalyq qyzmetterge halyqtyń teń qoljetimdiligin qamtamasyz etý, turǵyn úı-kommýnaldyq jaǵdaıdy jaqsartý jáne turǵyn úı qurylysyn damytý, sondaı-aq kóliktik baılanysty qamtamasyz etý jáne eldiń kóliktik-tranzıttik áleýetin joǵarylatý esebinen azamattardyń qolaıly ómir súrý ortasyn qurý».

Elordadaǵy sońǵy nátıjelerdiń ishinde eń bir aýyz toltyryp aıtarlyq jaıyt, elorda halqynyń 99,9 paıyzy, ıaǵnı túgelge jýyǵy ortalyqtandyrylǵan sýmen qamtý júıesine qosylǵan tuǵyn. Al jol-kólik ınfraqurylymyn damytý maqsatynda jergilikti mańyzy bar avtomobıl joldaryn salýǵa jáne rekonstrýksıalaýǵa 82,5 mlrd. teńge bólindi. Aǵymdaǵy jyly 13 km jańa jol salý jáne 55 km avtojolǵa ortasha jóndeý júrgizý josparlanyp otyr eken.

Eldiń barlyq aımaqtaryn teńdeı jetildirip, turmysqa qajetti jaǵdaıdy halyqqa jasap berý Qazaqstan prezıdenti Qasym-Jomart Toqaevtyń basty maqsattarynyń biri jáne sol maqsatty júzege asyrý úshin elimizde «Qýatty óńirler – eldi damytýdyń draıveri» Ulttyq jobasy qabyldanyp, Respýblıkanyń túkpir-túkpirinde iske asa bastady.

Osy rette 2023 jyly «Qýatty óńirler – eldi damytýdyń draıveri» Ulttyq jobasy aıasynda ınjenerlik-kommýnıkasıalyq ınfraqurylym obektilerin salýǵa Astanada 22,6 mlrd. teńge qarastyrylyp, elorda da óz tarapynan jobany iske asyrý maqsatynda jumysqa kirisip ketken bolatyn.

Aıta ketý kerek, respýblıkalyq búdjettiń transfertterinen jobany iske asyrýǵa tek 6,7 mlrd teńge qarastyrylsa, al 5,0 mlrd teńge memlekettik qundy qaǵazdar shyǵarý esebinen qaryz qarajaty bolyp tabylady. Joba aıasynda jergilikti búdjet qarajaty esebinen 10,9 mlrd teńge bólinip, jospardy iske asyrýǵa jumsalmaq ekenin de aıta ketý kerek.

Astanada «Qýatty óńirler – eldi damytýdyń draıveri» Ulttyq jobasyn nasıhattaý jumystary da qarqyndy júrgizilip jatyr. Esterińizde bolsa, ústimizdegi jyly tamyz aıynda atalǵan jobany iske asyrý maqsatynda Astana qalasynyń eńbek mobıldiligi ortalyǵynda Soltústik Qazaqstan oblysynyń Jambyl aýdanyna qonys aýdarý boıynsha keńes ótip, turǵyndarǵa birshama jeńildikter men kómekter beriletini aıtylǵan. Atap aıtqanda, baspana satyp alý úshin sertıfıkat, úı jaldaýǵa qarajat pen qaıtarymsyz granttar jáne otbasynyń ár bir múshesine sýbsıdıa berý men turaqty jumysqa turǵyzýǵa kómektesý qarastyrylǵany aıtylǵan.

Osy rette Astanada jyl saıyn óńirlik aýyl sharýashylyǵy jármeńkeleri de ótip turatynyn aıta ketken jón. Óńirlerdiń jármeńkesinde Túrkistan, Atyraý men Jambyl, Almaty jáne Jetisý oblystary, Qostanaı, Pavlodar men Abaı, SHQO jáne Qaraǵandy, Ulytaý, SQO, Aqóbe, sondaı-aq Aqmola oblystary ózderiniń jergilikti ónimderin astanalyqtarǵa usynyp, eldi qýantyp otyratyny belgili. Mundaı bastama aımaqaralyq baılanysty nyǵaıtyp, óńirlerdiń saýda sattyǵy men kásipkerligin damytýǵa oń yqpal etetini sózsiz.

Joǵaryda aıtyp ótken barlyq mysaldar «Qýatty óńirler – eldi damytýdyń draıveri» Ulttyq jobasy búginde bas qalada da óz nátıjesin bere bastaǵanynyń aıqyn kórinisi deýge bolady.