Ózgeristerge sáıkes, medısınalyq uıymdar men jeke medısınalyq praktıkamen aınalysatyn jeke tulǵalar medısına qyzmetkerleriniń kásibı jaýapkershiligin saqtandyrýǵa jáne 14 saqtandyrý uıymyn qamtıtyn Biryńǵaı saqtandyrý pýlymen saqtandyrý shartyn jasasýǵa mindetti.

“Saqtandyrý tólemderi dárigerlerdiń baıqaýsyzda jasalǵan kásibı qatelerinen zardap shekken pasıentke tólenedi. Ómiri men densaýlyǵyna zıan keltirý faktisin rastaý jáne saqtandyrý tólemin alý úshin pasıentke nemese onyń jaqyn týystaryna densaýlyq saqtaý sýbektisine júginý qajet. Medısınalyq qyzmetti júzege asyrý nátıjesinde pasıenttiń ómiri men densaýlyǵyna zıan keltirý faktisiniń bolýy týraly sheshimdi táýelsiz saraptama komısıasy qabyldaıdy”, – delingen habarlamada. 

Pasıent TSK qorytyndysynyń nátıjelerimen kelispegen jaǵdaıda densaýlyq saqtaý mınıstrliginiń medısınalyq jáne farmasevtıkalyq baqylaý komıtetine nemese sotqa júginýge quqyly.

“Zańda saqtandyrý tólemderiniń eń az somasy belgilengen. Ol pasıentke úshinshi, ekinshi jáne birinshi toptaǵy múgedektik belgilengen jaǵdaıda 500, 600, 800 AEK bolady. Tıisinshe múgedektigi bar bala 500 AEK, ólimge ákelgen zıan keltirilgeni úshin 3 000 AEK, múgedektik belgilenbeı pasıenttiń ómiri men densaýlyǵyna keltirilgen zıan úshin 300 AEK-ten aspaıtyn saqtandyrý tólemderi tólenedi. Sondaı-aq Zańda osy densaýlyq saqtaý sýbektisi tólegen saqtandyrý syılyqaqysy somasynyń 5%-ynan aspaıtyn mólsherde saqtandyrylǵan medısına qyzmetkerlerine advokattardyń qyzmetterine aqy tóleýge arnalǵan shyǵysty óteý somasy belgilengen”, – delingen aqparatta.