Memleket basshysy Qasym-Jomart  Kemeluly Toqaev ekonomıkalyq jáne áleýmettik damýdyń negizgi basymdyǵy retinde ýnıversıtet ǵylymyn jáne ınfraqurylymyn damytý mańyzdylyǵyn únemi nazarda ustap keledi. Osyǵan sáıkes, Ál-Farabı atyndaǵy Qazaq ulttyq ýnıversıtetinde «Farabi Hub» ınovasıalyq ónimder men joǵary tehnologıalyq jobalar ortalyǵy boı kóterdi. QazUÝ-dyń 90 jyldyq mereıtoıy aıasynda ashylǵan habtyń maqsaty – ozyq bilimge, tehnologıalar men resýrstarǵa qol jetkizýdi qamtamasyz ete otyryp, ǵylymı ázirlemeler men tehnologıalyq ıdeıalardy naqty ekonomıkaǵa engizýdi jedeldetý.

Bul týraly Ál-Farabı atyndaǵy QazUÝ Basqarma Tóraǵasy-Rektory Janseıit Túımebaev       Ál-Farabı atyndaǵy Qazaq ulttyq ýnıversıtetinde Almaty qalasynyń ákimdigimen birlesip uıymdastyrylǵan «Ǵylym, bıznes jáne óndiris yqpaldastyǵy» atty forýmda arnaıy toqtaldy.

–  «Farabi Hub» ýnıversıtettermen jáne ǵylymı ınstıtýttarmen, sondaı-aq ınvestor kompanıalarmen áriptestik baılanys ornatady. Birlesken zertteýler júrgizilip, jańa tehnologıalar ázirlenedi. Sońǵy úlgidegi qurylǵylarmen jabdyqtalǵan ǵylymı zerthanalar ǵylym men tehnologıanyń ártúrli salalarynda zertteýler júrgizip, tájirıbe jasaýǵa múmkindik beredi, – dedi oqý ornynyń basshysy.

Munda ZTE, «ZooStan» Ortalyq Azıany zertteý jónindegi halyqaralyq ǵylymı-zertteý ortalyǵy,  Soltústik-batys polıtehnıkalyq ýnıversıtetimen birlesken mıkrospýtnıkter zerthanasy, Bıologıa jáne bıotehnologıa zerthanasy, Hımıa jáne hımıalyq tehnologıa zerthanasy, Zamanaýı qoldanbaly fızıka jáne joǵary tehnologıalar zerthanasy, «Robototehnıka jáne mehatronıka RoboMech» ǵylymı-bilim berý ortalyǵy, Dárilik ósimdikterdi ǵylymı-zertteý ortalyǵy, Sot saraptamalary ortalyǵy, Ǵylymı-tehnologıalyq park  ornalasqan.                                                                                                                                                    «Farabi Hub» ortalyǵynyń jalpy aýdany 5000 sharshy metrdi quraıdy.