QYZYLORDA. QazAqparat - Búgin Qyzylordada Nartaı Bekejanovtyń 125 jyldyǵyna arnalǵan «Ózderiń biler Nartaımyn» atty Nartaı ánderin oryndaýshylardyń respýblıkalyq konkýrsy ótti.
Nartaıdaı nar tulǵanyń halqyna qaldyrǵan mol murasy el jadynda. Onyń ózgeshe óner týyndylary qazaq mádenıetiniń máıegine aınalyp otyr. Baıqaýdyń basty maqsaty da Nartaıdyń azamattyq, ónerpazdyq biregeı tulǵasyn jas urpaqtyń sanasynda jańǵyrtý boldy. Sondaı-aq, bul baıqaý respýblıka kólemindegi dástúrli ánshilerdiń tájirıbe almasýyna, Qazaqstandaǵy dástúrli án mektepterin bir arnada toǵysýyna sebep boldy.
Oblys ákimi Qyrymbek Kósherbaev qazaq án ónerinde syrnaı dástúrin qalyptastyrýshy, ánshi-kompozıtor, zamana bulbuly Nartaı Bekejanovtyń 125-jyldyǵymen quttyqtap, baıqaýǵa qatysýshylarǵa sáttilik tiledi.
- Halqy qadirlegen Nartaıdyń óneri san urpaq sýsyndap, jas ónerpazdar tabyna bas ıetin káýsar bulaq tárizdi. Bıyl sol qudiretti ónerdiń ıesi Nartaı Bekejanovtyń 125 jyldyq mereıtoıy. Táýelsiz eldiń jańa urpaǵy Nartaı murasyna múlde tyń turǵydan kelip, onyń keleshek órisine sony serpin beretinine biz kámil senemiz, - dedi oblys ákimi.
Óner dodasyna elimizdiń ár óńirinen 22 úmitker qatysty. Olar baıqaý barysynda N.Bekejanovtyń shyǵarmashylyǵynan bir án jáne óz óńiriniń dástúrli án mektebiniń bir ánin oryndady. Baıqaýǵa Ramazan Taımanov, Shahmardan Ábilov, Almas Almatov, Qajybek Bekbosynov syndy dástúrli án-jyr maıtalmandary qazylyq etti. Konkýrs qorytyndysy boıynsha Nartaı jyr mektebiniń izin jalǵastyrýshy Qyzylordalyq Muhamedáli Bekpeıisov Bas júldeni qanjyǵasyna baılady. Al atyraýlyq Aqmaral Noǵaıbaeva -1 oryn, astanalyq Zýlfıa Baımyrzaeva - 2 oryn, qaraǵandylyq Dáýrenbek Arkenov 3 oryndy ıemdendi.
Derekkóz: QazAqparat
