ÓSKEMEN. QazAqparat - «Bizdiń zamanda jigit úshin mańyzdysy - tańdaǵan mamandyǵy boıynsha bilim alý, qosymsha áskerı mamandyqty ıgerý, Otan aldyndaǵy boryshyn óteý úshin áskerge barý, odan keıin mansabyn oń jolǵa qoıyp úıli-barandy bolý».
Suhbat bergen «Aıdyn» birinshi respýblıkalyq áskerı-patrıottyq jıynynyń jeńimpazy, Astanada ótken patrıottar forýmynyń delegaty Almat Qaıyrbekovtiń sózderi osylaı bastaldy. Spıkeri Almat bolǵan D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń áskerı kafedrasy stýdentteriniń komandasy Qaraǵandy túbindegi oqý polıgonyndaǵy jarystarda eldiń JOO áskerı kafedralarynyń 25 quramasynyń ishinde birinshi orynǵa ıe boldy. «Aıdyn» áskerı-patrıottyq jıynyna áskerı-patrıottyq klýbtardyń, «Jas ulan» mamandandyrylǵan ınternattardyń jáne JOO áskerı kafedralarynyń 50 komandasy qatysty.
Jeke synda Kalashnıkov avtomatynan oq atý boıynsha Almat júldeli orynǵa ıe bolyp, óz JOO áskerı kafedrasynyń Qazaqstannyń joǵary bilim ordalary ishinen «Úzdik áskerı kafedra» atanýyna septesti.
Qazir 21 jastaǵy Almat SHQMTÝ 4 kýrsynda «tústi metalýrgıa» mamandyǵy boıynsha bilim alyp jatyr. Ekinshi jáne úshinshi kýrsta ol JOO áskerı kafedrasynda qosymsha bronetank júıeleriniń tehnıka-mehanıkasy áskerı mamandyǵyn ıgerdi. Bir jyldan soń dıplomyn qorǵaǵannan keıin Almat áskerı bılet pen leıtenant ataǵyna ıe bolady.
Nysanaǵa dál kózdep atýdy qaıdan úırengenin jáne osyndaı áskerı mamandyqty nelikten tańdaǵanyn suradym.
«Men Qaton-Qaraǵaı aýdanynanmyn, - dedi Almat, - ákem qoryqshy bolyp jumys istedi, mektepte de bastapqy áskerı daıyndyq sabaǵy jaqsy júrgizildi. Nelikten osyndaı áskerı mamandyqty tańdaǵanyma keler bolsaq, tehnıka - meniń ekinshi ómirim. Únemi kóliktermen aınalysatynmyn. Qozǵaltqyshtyń dybysyn jaqsy kóremin. Al tank - bul qýatty tehnıka, onyń ishinde ózińdi myqty er jigit retinde sezinesiń».
- Almat, patrıottar forýmyna qatysýdan qandaı áser aldyń?
- Patrıottar forýmynda «Aıdyn» respýblıkalyq áskerı-patrıottyq jıynynyń qatysýshylarymen kezdestik. Sóıleıtin sózdi birge daıyndadyq. Qazaqstandyq saıası elıtany - depýtattardy, májilismenderdi, mınıstrler men belgili tulǵalardy betpe-bet kórgende qysylyp qaldyq. Alaıda qatty qobaljymadyq», - dedi Almat.
- Mektepte oqyǵanda «mektep prezıdenti» bolǵanmyn. Sondyqtan qoǵam aldynda sóz sóıleý mashyǵym bar.
«Máńgilik el» - bul eldiń bolashaǵy, júzdegen ult ókili turatyn qonaqjaı elimizdiń birligi ekenine senemin. Qazaqstanda meıirimdi, ashyq adamdar ómir súrip jatqanyn kórip otyrmyz. Mundaı mentalıtetpen birikken halqymyzdyń bolashaǵy órkendeý men birtutastyqqa baǵyt alady. Bizdiń elimizde ár adam ultyna qaramastan, úlken jetistikterge qol jetkize alady. Barlyǵy adamnyń qalaýy men densaýlyǵyna baılanysty.
- Almat, bul taqyryp boıynsha qatarlastaryńmen jıi pikir talastyrasyńdar ma? Sen olarǵa ne aıtasyń?
- Iá, biz barlyq máseleni talqylaımyz. Dostaryma aıtatynym - bilim alyp, mamandyq ıgerip, erinbeı áskerı mamandyqqa ıe bolyp, mindetti túrde Otan aldyndaǵy boryshty óteý kerek. Áskerde er jigitke tán qasıetke ıe bolasyń, áskerde balalyq shaqtan eresek ómirge qadam basyp, ómirge degen kózqarasyń ózgeredi. Bul - naǵyz erlik mektebi.
- Instıtýtty támamdaǵan soń mamandyǵyń boıynsha jumys isteısiń be, álde kelisimshart boıynsha áskerı qyzmette bolasyń ba?
- Zaýytta mamandyǵym boıynsha jumys isteýdi josparlap otyrmyn. Alaıda men kez-kelgen áskerı bólimde de qyzmet ete alamyn. Dıplom alǵan soń tańdaý jasaımyn.
