QYZYLORDA. QazAqparat-Qyzylordada bıyl kóktemde qazyǵy qaǵylǵan shyny zaýytynyń qurylys jumystary josparǵa sáıkes júrýde. Keshe oblys ákimi Qyrymbek Kósherbaev qurylys alańynda bolyp, jumys barysymen tanysty. 
Bul týraly oblystyq ákimdiktiń baspasóz qyzmeti habarlady.

Qazirdiń ózinde óndiris ornyna qajetti daıyn ónimder qoımasy irgetasynyń 95 paıyz jumysy aıaqtaldy. Sondaı-aq ǵımarattyń ústińgi jaǵynyń qurylysyn salý bastalyp, ol úshin kolonnalar (temir qurastyrmalar) ornatylýda. Qazan aıynyń sońyna deıin barlyǵy 200 kolonna  ornatylatyn bolady. Al qys kúnderi ishki  jumystary, ıaǵnı metal qurylǵysyn montajdaý jumystary qolǵa alynady. Zaýyt qoımasy salynyp bitken soń munda temir jol tuıyǵyn júrgizý  bastalmaq.

«Qazir qurylys jumystaryna 110 jumysshy jáne 20 tehnıka jumyldyrylyp otyr. Barlyǵy keste boıynsha júrýde. Qurylys zattarynyń basym bóligi jergilikti jerden alynyp jatyr. Jumysshylarǵa da bar jaǵdaı jasalǵan. Zaýyt tolyq iske qosylǵanda turaqty 350-400 jańa jumys orny ashylmaq», - deıdi «Orda Glass Ltd» JSHS-niń qurylys jónindegi dırektory Begaly Toqaev.

Oblys ákimi Qyrymbek Kósherbaev qurylystyń sapasyna asa mán berýdi jáne josparǵa sáıkes ýaqtyly júrgizilip otyrýyn tapsyrdy. Aıta keteıik, shyny zaýytynyń qurylysy Qyzylorda qalasy, Tıtov móltekaýdanynda ornalasqan ındýstrıalyq aımaqta júrgizilip jatyr. Bolashaqta munda feroqorytpa zaýytyn salý da josparda.

Al, shyny zaýyty iske qosylǵan kezde kúnine 600 tonna (jylyna 197 100 tonna) shyny tabaqshasyn óndirýge qýatty. Shyny óndirisine qajetti shıkizattyń 95 paıyzy jergilikti jerden alynatyn bolady. Bul mega jobanyń jalpy quny 52 mlrd. teńgeni quraıdy.

 Esterińizge sala keteıik, qarjynyń 80 paıyzyn «Qazaqstan damý banki» bólse, qalǵan 20 paıyzyn «Steward Engineers» AQSH kompanıasy men Qazaqstan ınvestısıa qory ınvestor retinde qarjylandyrmaq.

Derekkóz: Qazaqparat