ALMATY. QazAqparat - Búgin Almaty qalasynyń emhanalary men medısınalyq ortalyqtarynda jazylmas dertke shaldyqqan naýqastarǵa hospıstik jáne pallıatıvtik kómek kórsetý boıynsha aqparattyq aksıa júrip jatyr.
Bul shara 10 qazan - Dúnıejúzilik hospıster jáne pallıatıvtik qyzmetter kúni aıasynda arnaıy uıymdastyryldy.
«Pallıatıvtik qyzmet, bul búkil álem boıynsha jańa uǵym. Ony densaýlyq saqtaý salasynyń jańa baǵyty, jańa salasy deýge bolady. Ol aıyqpas dertke shaldyqqan, arnaıy medısınalyq em qoldaný toqtatylǵan naýqastarǵa kómek kórsetýge baǵyttalǵan. Búgin Almaty qalalyq Onkologıalyq ortalyǵynyń mamandary birqatar emhanalar men medısınalyq ortalyqtardy aralap, dárigerler jáne em qabyldaýǵa kelgender arasynda pallıatıvtik kómek kórsetý boıynsha túsindirý jumystaryn júrgizýde jáne olarǵa arnaıy jadynamalar taratady», - dedi «QazAqparat» tilshisine bergen suhbatynda búgingi sharany uıymdastyrýshy uıym - Qazaqstannyń pallıatıvtik kómek kórsetý qaýymdastyǵynyń prezıdenti, «Qaterli isikke qarsy birge kúresemiz» qoǵamdyq qorynyń dırektory Gúlnar Qońyrova.
Sonymen qatar ol aıyqpas dertke shaldyqqandardyń jan azabyn jeńildetýde olardyń týǵan-týystarynyń alar orny erekshe ekendigin jetkizdi.
«Bul naýqastar kóp jaǵdaıda qoǵam nazarynan, densaýlyq saqtaý salasynan tys qalyp jatady. Bul túsinikti de. Olar jalǵyzdyqtan zardap shegedi. Medısına dármensizdik tanytqan soń, boılaryn qorqynysh bıleıdi. Biraq pallıatıvtik qyzmette «kómek kórsete almaıyz» degen sóz aıtylmaıdy. Aýrý, syzdaýǵa qarsy emdi bile otyryp, naýqastyń jan azabyn azaıtyp, kútimin jaqsartýǵa ábden bolady. Bul ádisterge onyń týystaryn úıretý óte mańyzdy. Óıtkeni mundaı adamdardyń 95 paıyzy hospıste emes, úıde jatqandy qalaıdy. Sol úshin olardy jalǵyz qaldyrýǵa bolmaıdy. «Ne aıtam» dep qınalýdyń qajeti joq. Eń bolmasa, qasyna kelip, qolynan ustap, sońǵy sátke deıin janynda bolatyndyǵyńyzdy bildirseńiz, sonyń ózi oǵan úlken demeý», - dedi G. Qońyrova.
Aıta ketelik, Almaty Onkologıalyq ortalyǵynyń bazasynda ótken jyldyń jeltoqsan aıynan beri onkologıalyq aýrýlarǵa shaldyqqandarǵa úıde kómek kórsetý mobıldi brıgadasy jumys istep keledi.
Al «Qaterli isikke qarsy birge kúresemiz» qoǵamdyq qorynyń uıymdastyrýymen Almaty qalasynda 2012 jyldan beri 600-den astam dáriger pallıatıvtik kómek kórsetý boıynsha oqytý kýrstary men semınarlarǵa qatysqan. Olardyń ishinde Almaty Onkologıalyq ortalyǵy, aýrýhanalar, emhanalar jáne birqatar jeke medısınalyq ortalyqtardyń dárigerleri bar.
Derekkóz. Qazaqparat
