ORAL. QazAqparat - Astanada ótken «Máńgilik el - bolashaǵy birtutas el» atty patrıottar forýmyna búkil elge belgili adamdarmen birge qatysyp qaıtqanym úshin ózimdi baqytty sezinemin. Bul týraly Zelenov aýdany Dostyq aýylynda turatyn 8-synyp oqýshysy Nıkıta Túkın málim etti.
Onyń aıtýynsha, mundaı deńgeıdegi jıynǵa alǵash ret qatysqan. Sondyqtan bári tańsyq, bári qyzyq kórindi. Onyń ústine Astana qandaı! Bos ýaqyttarynda «Báıterek» syndy elorda keremetterin kózben kórýdiń áseri bólek edi.
Patrıottar forýmynda ǵaryshker Aıdyn Aıymbetov, ataqty boksshy Gennadıı Golovkın jáne basqa áıgili jandarmen birge bolyp, olardyń sózin tyńdaýdyń ózi nege turady. Osyndaı otanshyl adamdardy kúlli Qazaq eli maqtanysh tutyp, úlgi alatyny anyq.
«Men, árıne, «Jyl patrıoty» atanamyn dep oılaǵanym joq. Bári kútpegen jerden boldy. Onyń ústine «Erligi úshin» atalymyn ǵaryshker Aıdyn Aıymbetovtiń qolynan alǵanymda, keýdemdi maqtanysh sezimi kernedi. Ondaı batyrlar kóp emes qoı. Sondyqtan bul jaqsy yrym dep esepteımin. Bolashaqta tótenshe jaǵdaı salasynyń mamany bolǵym keledi. Adamdarǵa ár ýaqytta kómekke kelýge daıyn turatyn bolamyn. Bul kim-kimniń de qolynan keledi. Tek adal ómir súrip, beıbit aspan astynda aıanbaı eńbek ete bilý kerek. Eń bastysy, Elbasy usynǵan «Máńgilik el» ıdeıasynyń júzege asýyna biz de óz úlesimizdi qosyp, ol úshin óz Otanymyz ben halqymyzdy súıe bilý kerek», - dedi N.Túkın.
Eske sala keteıik, N.Túkın bıylǵy 24 mamyrda Shaǵan ózenine batyp bara jatqan qos qyzdy ajaldan qutqaryp qalǵan bolatyn. Ony BQO TJ departamenti aldaǵy ýaqytta kásibı qutqarýshylardy daıarlaıtyn Kókshetaý tehnıkalyq ınstıtýtyna oqýǵa shaqyryp otyr.
Derekkóz. QazAqparat
