ASTANA. QazAqparat -  Almaty ákimi Baýyrjan Baıbek BUU-y Qorynyń Ortalyq Azıa boıynsha halyqty qonystandyrý (IýNFPA) Sýbóńirlik Ofısiniń basshysy Nıkolaı Botevti qabyldady.
Kezdesýdiń basty taqyryby retinde Birikken Ulttar Uıymynyń 70 jyldyǵyn merekeleý sóz boldy, dep habarlaıdy ákimdiktiń baspasóz qyzmetinen.

«Almatylyqtar álemdik qoǵamdastyqpen birge Prezıdent Nursultan Nazarbaevtyń Nú-Iorkte ótken BUU Bas Assambleıasynyń 70-shi sesıasyndaǵy ortaq debattardaǵy sóılegen sózin zeıin qoıa tyńdady. Bizdiń elimiz úshin bul óte mańyzdy. Ult basshysynyń beıbitshilik súıgish saıasaty arqasynda biz alǵashqylardyń biri bolyp ıadrolyq qarýdan bas tarttyq, ıgi bastamalardyń barlyǵy óńir halqynyń damýy men gúldenýine baǵyttalǵan», - dedi ákim.

Osyǵan oraı qala basshysy Almatyda BUU-nyń mereıli saltanattaryn ótkizý Almatynyń ǵana emes, jalpy Qazaqstannyń halyqaralyq mártebesin arttyrýdaǵy mańyzdy qadam bolatyndyǵyn atap ótti. BUU-nyń Almatydaǵy kúnderi aıasynda, aldyn ala jasalǵan baǵdarlama boıynsha 20-24 qazan kúnderi aralyǵynda kórmeler, ǵylymı konferensıalar, konsertter ótkizý josparlanǵan. Bulardan ózge, «BUU álemdi kógildir túske boıaıdy» atty halyqaralyq bastama aıasynda megapolıstiń kórneki oryndary - Respýblıka Saraıy men «Qazaqstan» qonaqúıi neon jaryǵymen kómkeriledi.

Qala basshysy Almatynyń BUU úshin óńirlik habqa aınalýǵa tolyq múmkindigi bar ekenin jáne megapolıstiń ınvestısıalyq- ekonomıkalyq tartymdylyǵyn da atap ótti. «Sheteldik ókildikter men halyralyq uıymdardyń durys jumys isteýleri úshin qolaıly jaǵdaı týǵyzý - basty mindetterdiń biri», - dedi ákim.

Derekkóz: QazAqparat