ASTANA. QazAqparat - Tuńǵysh ǵaryshker áıel Valentına Tereshkova mingen avtobýs búginde Qostanaı oblysyndaǵy shaǵyn aýyldardyń birinde saqtaýly. Bul týraly «Habar» arnasy habarlady.
Qamysty aýdanyndaǵy sharýashylyqtyń jeke koleksıasynda kóneniń kózindeı bolyp 30 shaqty retrokólik saqtalǵan. Sergeı Chınchýk - garaj meńgerýshisi. Onyń kóp ýaqyty osy kólikterdiń arasynda ótedi. Munda turǵan tehnıkalardyń árqaısynyń óz tarıhy, óz taǵdyry bar. Meńgerýshi olar jaıly áńgimeleýden jalyqpaıdy. Mysaly, «Vıllıs» áskerı kóligin sonaý surapyl soǵys jyldary barlaýshylar vzvodynyń komandıri mingen.
«Kólik kórgennen-aq qatty qyzyqtyrdy. Ǵalamtordy aqtaryp kóp maǵlumatqa qanyqtym. Bul mashınany alǵash kórgende meniń kóz aldyma birden soǵys dalasy elestedi. Munda júrgizýshi soldat otyrǵan. Al ofıser qandaı da bir barlaý sharasyn júrgizýde nemese jaı ǵana mańyzdy bir aqparat ákele jatyr. Bul tarıh qoı. Árıne, osydan keıin bul kólikke degen qurmetiń arta túsedi», - deıdi Sergeı Chınchýk.
Murajaı óte sırek kezdesetin biregeı eksponattarǵa baı. Máselen, ishi tolyq jabdyqtalǵan myna avtobýs ǵaryshkerlerdi tasymaldaýǵa arnalǵan. Qazaqstanda nebary ekeý-aq. Biri - Baıqońyrda, ekinshisi osy Altynsarın aýylynda. Bul kólikke kezinde tuńǵysh ǵaryshker áıel Valentına Tereshkova da mingen. Jalpy tarıhı tulǵalardyń qolynyń taby qalǵan tehnıkalar munda az emes. Mysaly, 1949 jyly shyqqan «ZIS-110» avtokóligi. Kezinde bul mashınany marshal Jýkovtyń ózi mingen kórinedi. Kelesi «Gaz-14» - Keńes úkimeti músheleriniń qyzmet avtokóligi. Jalpy eksponattardyń ishinde kóne klasıkalyq mashınalar az emes. Sonyń biri - «ZIM» markasy. Sodan keıin turǵan Uly Otan soǵysy kezinde áskerıler mingen «GAZ-67» avtokóligi. Mashınalar murajaıynda osyndaı-osyndaı 30-dan astam jádiger saqtaýly tur. Mundaı ǵajaıyp muraǵat shaǵyn aýyl túgili, iri qalalardyń ózinde kezdese bermeıtini anyq. Alýan tarıhtyń kýási bolǵan kóne kólikterdiń qaısybiri syılyqqa kelgen, qaısybirin sharýashylyq qarajatyna satyp alynǵan. Mysaly, mynaý traktor 1949 jyly Stalıngrad zaýytynda jasalypty. Aýyl shaýashylyq kóligi osydan 40 jyl buryn kólge batyp ketken. Áıteýir traktorshy aman qalsa kerek. Keıin murajaıdyń negizi qalaýshylar batpaqqa batyp ketken traktor jaıly aýyl turǵyndarynan estip, bilip, sý astynan tartyp alyp shyǵypty. Qansha eski bolsa da, mundaǵy tehnıkalardyń bári de júrip tur. Retro kólikter jyl saıyn jergilikti jerde ótip turatyn merekelik sherýge qatysady. Kóneligimen de, tarıhtyń kómbesi bolǵandyǵymen de qymbat murajaı bul kúnde Qamysty aýdanynyń ǵana emes, tutas aımaqtyń maqtanyshy aınalǵan.
Derekkóz. QazAqparat
