ASTANA. QazAqparat - Qazaq handyǵynyń 550 jyldyq mereıtoıynyń qarsańynda Almaty oblysynyń sáýletshileri Taraz qalasyna erekshe syı jasady. Atap aıtqanda 50 metrlik alyp barelef pen qazaqtyń ataqty jyr alyby Jambyl Jabaevtyń eskertkishine jasalǵan kúrdeli jóndeý jumystarynan keıin reńi jarasqan týyndylar qalanyń kórkin keltirýde. Bul týraly Almaty oblysy ákiminiń baspasóz qyzmetinen habarlady.
Jambyl oblysynyń turǵyndaryna tartý etilgen erekshe syıdyń alǵashqysy jyr alyby Jambyl Jabaevtyń eskertkishine jasalǵan kúrdeli jóndeý jumystary boldy. Músinniń qurylysyn Qazaqstan Respýblıkasynyń qurmetti sáýletshisi Qazybek Jarylǵapovtyń basshylyǵymen Qazaqstan Respýblıkasy sáýletshiler jáne qalaqurylys odaǵynyń múshelerinen qurylǵan top júrgizdi. Nysannyń qurylys jumystaryna 23,6 mln. teńge qarajat jumsaldy.
Sondaı-aq Jetisýlyqtar Taraz qalasyndaǵy Shahrıstan bazary arkasynyń eki jaǵyna bıiktigi 2 metr, uzyndyǵy 50 metrlik barelef qabyrǵasyn ornatyp berdi.
Barelef qabyrǵasy tórt negizgi taqyryptan quralǵan. Atap aıtqanda:
Birinshi bóliginde qazaq tarıhynyń bastaýy retinde «Altyn adam» beınesi;
Ekinshi bóliginde qazaq halqynyń memlekettiliginiń bastaýyn áspetteıtin, qazaq handyǵynyń negizin qalaǵan Jánibek pen Kereı handardyń beınesi;
Úshinshi bóliginde elimizdiń bas qalasy - Astana men Elbasy Nursultan Nazarbaevtyń beınesi;
Tórtinshi bóliginde Jambyl Jabaev pen onyń «Lenıngradtyq órenim» atty óleńi beınelengen.
Nysannyń qurylysyn S.Abdırovtyń basshylyǵymen «Vıbro-Tas» JSHS júrgizdi. Jumsalǵan qarajat quny 50 mln. teńge.
Barlyq jumystar demeýshilerdiń qarajatyna oryndaldy.
Bul ıgi istiń barlyǵyn qalaǵa jasalǵan syı qurmettiń nyshany dep qabyldaýǵa bolady.
Esterińizge sala ketsek, Qazaq handyǵynyń 550 jyldyq mereıtoıynyń atalyp ótilýine baılanysty Almaty oblysynyń Súıinbaı atyndaǵy fılarmonıasynyń eń úzdik jeztańdaı ánshileri men shyǵarmashylyq ujymdary, Bıken Rımova atyndaǵy oblystyq drama teatrynyń akterleri, beıneleý óneri men qoldanbaly óner sheberleri, túrli aspata oınaıtyn mýzykantshylar, Almaty oblysynyń qoǵam qaıratkerleri men tilshileri Taraza qalasyndaǵy sharalarǵa úlken yntyzarlyqpen at salysýda. Basty maqsat - oblys turǵyndary men qonaqtaryna óshkendi jandyryp, umyt qalǵandy tiriltip, tarıhymyz ben túp tamyrymyzdy jańǵyrtyp-ulyqtar merekelik kóńil kúı men este qalar áser syılaý.
Derekkóz: QazAqparat
