ASTANA. QazAqparat - Ońtústik Qazaqstan oblysynyń ákimi Beıbit Atamqulov Túlkibas aýdanyna jasaǵan jumys saparynda osylaı dedi. Aımaq basshysy ondaǵy «Arsen As» JSHS-niń jemis-jıdek konsentrattaryn jáne tabıǵı sýsyn shyǵarý sehynyń jumysymen tanysty.
Kásiporyn basshysynyń aıtýynsha, seh jumysy tolyq qýatyna shyqqanda óńir halqy Qytaı men Brazılıanyń jemis-jıdek shyrynyna qumartpaıtyn bolady. Ekologıalyq taza otandyq ónim oblystyń ǵana emes, respýblıkanyń qajettiligin qamtamasyz etýge qaýqarly bolmaq. Jobanyń jalpy quny 600 mıllıon teńgeni quraıdy. Onyń 480 mıllıon teńgesin «Maksımým» AIO qarjylandyrǵan. 

Aýdanǵa sapary barysynda oblys basshysy Mıchýrın aýyldyq okrýgindegi «Móldir» JSHS-niń Túrkıalyq kompanıamen birlesip bastaǵan ıntensıvti baýyn aralady. 115 gektar alqapta "Golden delıshes", "Grant smıt" joǵary surypty almalary egilgen. Aıta ótken jón, tátti almasymen tanymal Túlkibas aýdanynda 2600 gektarǵa alma baýy egilgen.

Sondaı-aq, bul kúni B.Atamqulov T.Rysqulov aýylyndaǵy aýdandyq «Nur Otan» partıasynyń jańa ǵımaratyn aralap, aýyldaǵy T.Rysqulovqa arnalǵan eskertkishke gúl shoqtaryn qoıdy. Aýdanda memleket jáne qoǵam qaıratkeri Turar Rusqulovqa arnalǵan tórt eskertkish bar. 

Sapar barysynda oblys basshysy aýdan ortalyǵynyń bas josparymen tanysyp, aýdan arqyly ótetin «Batys Eýropa - Batys Qytaı» tranzıttik jol dáliziniń qurylysyn kórdi. Indýstrıaldy aımaqtyń tynys-tirshiligin baqylady. Túlkibastyń ereksheligine oraı, bul ındýstrıaldy aımaq tamaq ónimderin óndirý boıynsha jumys istemek. Ol úshin 15 joba jasalýy tıis. Búginge deıin onyń beseýi usynylǵan. Atap aıtsaq, oǵan «Kentaý» JSHS-niń konsentrat jáne tabıǵı sýsyndar óndirý sehy, «Jambýl baqshasy» kókónis jáne jemis-jıdekti qaıta óńdeý sehi, «Rah Ońtústik» JSHS-niń qus etin óńdeý sehi men «Shymkent Arka» JSHS-niń kókónis jáne jemis-jıdekti qaıta óńdeý sehi jáne «Dorservıs» ÓK-niń kókónis jáne jemis-jıdekti qaıta óńdeý sehi kiredi, dep habarlady OQO ákiminiń baspasóz qyzmetinen.

Derekkóz: QazAqparat