TARAZ. QazAqparat - Qazaq memlekettiliginiń 550 jyldyǵyn merekeleýge oraı mádenı-buqaralyq sharalardyń kólemdi baǵdarlamasy ázirlendi, dep habarlady QazAqparattyń Jambyl oblysyndaǵy tilshisi Galına Skrıpnık.
«Eger men qazir merekege arnap ázirlengen barlyq tartymdy is-sharalardy aıtyp qoısam, ol keıin qyzyqsyz bolyp qalady. Mereıtoılyq saltanattar aıasynda 2 myń jyldan astam tarıhy bar Taraz qalasynyń qonaqtary men turǵyndaryn aýqymdy mádenı-merekelik baǵdarlama kútip otyr. Merekeniń qurmetine ondaǵan sharalar josparlanǵan. Mysaly, Tuńǵysh Prezıdent saıabaǵynda kóshpendiler órkenıetiniń búkil tarıhy kórsetiledi. Bul balalardy da, qarttardy da qyzyqtyrady dep oılaımyn», - dedi baspasóz máslıhatynda Jambyl oblysy ákiminiń orynbasary Erqanat Mánjýov.

"Tuńǵysh Prezıdent saıabaǵynda eki kún boıy dala bıleýshileri men kóshpendilerdiń ómirlik ádet-ǵuryptarynyń birqatar kompozısıalary usynylatyn «Qazaq álemi» atty tarıhı-etnografıalyq keshen ashylady.

Qoldanbaly óner buıymdary, kóne kilemder, qarýlar, zergerlik buıymdar  kórmeleri, kóne qylyshtarmen  áserli qolma-qol urys qımyldary uıymdastyrylady. Sondaı-aq dala bıleýshileriniń joryqqa shyqqanda tikken shatyrlary men kıiz úıler ornatylyp, «Skıfter-saqtar qylyshy» releftik pannosy, «Jel daýysy» ınstallásıasy jáne t.b. ornalastyrylady", - dep baıandady E.Mánjýov. 

Konsertter men sharalar tiziliminde «Uly Jibek joly» etnofestıvaldary, «Dostyq» etnoqalashyǵy, halyq oıyndary boıynsha baıqaýlar, kıiz buıymdardan jasalǵan balalar alańy, qazaq kıiz úıiniń tarıhy men túrleri týraly tanymdyq baǵdarlamalar, kóshpendilerdiń qarýlary men saýyttary, «Arlan» kostúmder teatrynyń «Saqtardan qazaqtarǵa deıin» atty tarıhı shoý bar. 

9 qazan kúni "Aq shatyr" sahnalyq alańynda «Máńgilik saryn» - memlekettik akademıalyq sımfonıalyq orkestri, «Ǵasyrlar sazy» fólklorlyq-etnografıalyq ansambli, «Turan» etno-folklorlyq ansambli, «Qońyr» etno toby óz baǵdarlamalaryn usynady. «Berkinip sadaq asynǵan» eposynyń epıkalyq ánderi, «Jetisý ánderi» Jetisý án mektebi men Arqanyń «Arqa ánderi» án mektebiniń ánderi shyrqalady.

«8 qazanda Tuńǵysh Prezıdent saıabaǵynda qytaılyq Sıan qalasynan Uly Jibek joly baǵdarymen kelgen kerýen ekspedısıasynyń qatysýshylaryn qarsy alady», - dep atap ótti E.Mánjýov.

Budan basqa, «Qazaq handyǵy» eskertkishin saltanatty túrde ashý rásimi ótip, Almaty qalasy, Qyzylorda, Ońtústik Qazaqstan jáne Almaty oblystary ónerpazdarynyń merekelik konserttik baǵdarlamalary bastalady. Sondaı-aq bul kúni «Kóne Taraz» murajaıy ashylyp, Qazaq handyǵynyń 550 jyldyǵynyń qurmetine shyǵarylǵan kitaptardyń tusaýkeseri ótedi. «Balasaǵun» OKZ-da ótetin «Máńgilik el» jalpyulttyq ıdeıasyna arnalǵan aqyndar aıtysy eki kúnge jalǵasady. Onda Qazaqstan, Mońǵolıa, Qytaı jáne Ózbekstannan 14 jup aqyn kezdesip, ónerin kórsetedi.

Teatr ónerin súıýshiler Almatynyń M.Áýezov atyndaǵy teatrynyń, sondaı-aq jergilikti teatr trýppasynyń tarıhı spektáklderin tamashalaı alady.

Taraz ıpodromynda Qazaqstanda alǵash ret at polosy oıynynyń tanystyrylymy josparlanǵan. Budan basqa, «Atshabar» at sporty kesheninde «Uly Dala oıyndary» atty ulttyq at sporty jarystary ótedi.

Mereıtoılyq saltanattar aıasynda 9 qazan kúni «Taraz-Arena» sport saraıynda QR Prezıdentiniń júldesi oınatylatyn qazaq kúresinen "Eýrazıa barysy" halyqaralyq jarysy ótedi.

Mereıtoılyq sharalar kórkem teatrlandyrylǵan qoıylymmen jáne Ortalyq stadıondaǵy merekelik gala-konsertpen aıaqtalady.

Eske sala keteıik, Qazaq handyǵynyń 550 jyldyǵyn merekeleý bıylǵy jyly elimizdiń barlyq aımaqtarynda ótip jatyr. Negizgi sharalar 550 jyl buryn Talas pen Shý ózenderiniń arasyndaǵy Jaısan shatqalynda Kereı men Jánibek sultandar Qazaq handyǵynyń negizin qalaǵan jerde bolady. 

Derekkóz: Qazaqparat