ASTANA. QazAqparat - Memleket basshysy Nursultan Nazarbaev Qazaq handyǵynyń 550 jyldyǵyna arnalǵan monýmentti ashý rásimine qatysty,  dep habarlady Aqordanyń baspasóz qyzmeti.
Qazaqstan Prezıdenti rásim aıasynda monýment tuǵyryna gúl qoıyp, quttyqtaý sóz sóıledi.

Memleket basshysy barsha halyqty Qazaq handyǵynyń 550 jyldyǵymen quttyqtap, Astanadan bastalyp, Tarazda jalǵasyn tapqan merekelik sharalardyń mańyzdylyǵyn atap ótti.

«Ótken tarıhymyzdy zerttep, málimet jınaý úshin táýelsizdik jyldarynda álemniń túkpir-túkpirine ekspedısıalar uıymdastyryldy. Bizdiń tarıhymyz bastaýyn saq, ǵun, túrkilerden alyp, Kereı men Jánibek handardyń Shý alabyna kóship, Qazaq handyǵynyń týyn kóterýimen jalǵasady. Biz bul merekeni tarıhymyzdyń tereń ekendigin búkil álemge tanytý úshin, óskeleń urpaqqa jetkizý úshin ótkizip otyrmyz», - dedi Qazaqstan Prezıdenti.

Nursultan Nazarbaev Qazaq handyǵynyń 550 jyldyǵy jalpyhalyqtyq mereke ekenin atap ótti.

«Merekege oraı Taraz qalasynyń da kelbeti jańardy. Buǵan Qazaqstannyń barlyq oblysy atsalysty, sol úshin olarǵa alǵys bildiremiz. Osynyń bári - urpaqtyń ata-babalar amanatyna adaldyǵynyń, Uly Dala tarıhyna taǵzymynyń nyshany. 17 elden kelgen qonaqtarǵa alǵys aıtamyn»,  - dedi Memleket basshysy

Qazaqstan Prezıdenti Jambyl oblysynyń qarqyndy damyp kele jatqanyna da nazar aýdardy.

«Bıyl 170 myń sharshy metr baspana salyndy. Jyl basynan beri 7 mektep, 3 balabaqsha, aýrýhana paıdalanýǵa berildi. Indýstrıalandyrýdyń birinshi besjyldyǵy aıasynda 33 nysan iske qosyldy, ekinshi ónerkásiptik besjyldyqta 27 nysandy iske qosyp, 6 000 jumys ornyn ashý qarastyrylǵan.  «Batys Eýropa - Batys Qytaı jobasy» aıaqtalyp keledi. Osy qala arqyly temirjol, gaz qubyry ótedi. Munyń bári halyqtyń ıgiligi úshin jasalýda. Jambyl oblysy elimizdiń basqa da óńirleri sıaqty óz damýy jolynda jańa bıikterge jetetin bolady. Biz tabystarymyz arqyly álemdegi eń damyǵan 30 eldiń qataryna qosylý nıetindemiz, bul «Qazaqstan - 2050» strategıasynyń negizgi maqsaty bolyp tabylady. Sonymen qatar, «Nurly jol» jáne ındýstrıalandyrý baǵdarlamalary, sondaı-aq Bes ınstıtýsıonaldyq reforma da elimizdiń bolashaǵyna jol ashady», - dedi Nursultan Nazarbaev.

Memleket basshysy Jambyl oblysynda 100-den asa etnos ókilderi dostyq pen kelisimde ómir súrip jatqanyn aıtty.

«Biz kez kelgen merekeni halyqqa kóbirek ıgilik jasaý úshin paıdalanamyz. Álemde turaqsyzdyq, qaqtyǵystar men soǵystar bolyp jatyr, al bizdiń elde bári tatý ári ózara syılastyq negizinde ómir súrýde. Qazaqstandy álemniń ózge elderi biledi, qurmetteıdi. Elimiz qaqtyǵystardy sheshý isinde araǵaıyndyq jasap, Álemdik jáne dástúrli dinder kóshbasshylary sezin ótkizip keledi. Osynyń bárine halqymyzdyń birligi arqasynda qol jetkizdik», - dedi Qazaqstan Prezıdenti.

Sońynda Memleket basshysy kópshilikti taǵy da quttyqtap, ıgilik pen baq-bereke, sondaı-aq elimizge tynyshtyq pen beıbitshilik tiledi.

Monýmentti ashý rásimine 5000-ǵa jýyq adam qatysty. Eskertkish stellasynyń bıiktigi 28 metrdi quraıdy, onyń tuǵyrynda bıiktigi 4,2 metr bolatyn Kereı men Jánibek handardyń músinderi qoıylǵan.

Derekkóz. Qazaqparat