ALMATY. QazAqparat - Búgin Almatyda QR Tuńǵysh Prezıdentiniń qorynda Almaty ákimdigi men «EKSPO-2017» bas merdigeri quny 10 mlrd. teńge bolatyn ózara yntymaqtastyq týraly memorandýmǵa qol qoıdy.
Atalǵan kelisimge sáıkes endi Almaty qalasynyń kásiporyndary Astanada ótetin asa mańyzdy halyqaralyq jobaǵa qatysyp, «EKSPO-2017» jobasyn uıymdastyrý ǵana emes, qurylys jumystary men paıdalaný kezeńinde de óz ónimderin jetkizý jóninde uzaq merzimdi kelisimge kele alatyn boldy.
«Búgingi forýmǵa «EKSPO-2017» ulttyq kompanıasy atynan tóraǵa Ahmetjan Esimovtiń kelip jatqanyna qýanyshtymyz. Ahmetjan Smaǵululy - qaladaǵy kóptegen mańyzdy jobalardyń negizin qalaǵan adam. Kórmege 40-tan astam kompanıa qatysty. Men olardyń ónimderi óte sapaly dep oılaımyn. Almatylyq kásiporyndar «EKSPO-2017»-ge belsendi túrde qatysady. Elbasy aıtqandaı, EKSPO - ekonomıkamyzdyń draıveri, týrızm salasyn damytýǵa, jańa jumys oryndaryn ashýǵa múmkindik beredi. Almatynyń 200-ge jýyq kásiporny ár salada qazaqstandyq qamtýdy maksımaldy qamtamasyz etýge barynsha úles qosatyn bolady», - dedi qala ákimi Baýyrjan Baıbek.
Óz kezeginde «EKSPO-2017» UQ AQ basqarma tóraǵasy Ahmetjan Esimov Almaty kásiporyndarynyń qatysýynsyz halqaralyq kórmeni ótkizý múmkin emestigin jetkizdi.
«Kórmeni tamashaladyq. Kóptegen kompanıalardyń damýyn jaqsy bilem. Olarda ózim bolǵanmyn. Almatynyń potensıaly óte joǵary. Almaty - elimizdiń basty lokomotıvi. Munda ǵylym men bilim shoǵyrlanǵan. Osyǵan deıin qalanyń «EKSPO-2017» jobasyndaǵy qatysy óte belsendi emes bolatyn. Soma da asa máz emes. 550 mln. teńge. Budan bastap aımaqtyq kásipkerlerdiń qatysy belsendi bolady. Búgin quny 10 mlrd. teńge bolatyn kelisimge qol qoıamyz. Almaty - kelisim jasalyp otyrǵan 9-shy aımaq. Osyǵan deıin elimizdiń 8 aımaǵymen kelisimge kelgen edik», - dedi Ahmetjan Esimov.
Qala ákiminiń orynbasary Erlan Áýkenovtiń aıtýynsha, «EKSPO-2017» jobasyn júzege asyrýda Almatynyń áleýeti joǵary. Qalada 184 myń bıznes sýbektisi, 1800 óndiris orny, 2,5 myń qurylys kompanıasy, 900 týrısik fırma, 122 qonaq úı ornalasqan. Olardyń kópshiligi jalpyulttyq jobaǵa qatysýǵa úlken qyzyǵýshylyq bildirip otyr.
