Qazaq memlekettik qyzdar pedagogıkalyq ýnıversıteti qazaq fılologıasy jáne álem tilderi fakúltetiniń uıymdastyrýymen «Máńgilik Eldiń máńgilik tili» atty dóńgelek ústel ótti.
Tildi qorǵaý, tildiń qoldaný aıasyn keńeıtý, memlekettik tildiń mártebesi men mańyzyn keńinen nasıhattaý, jastardyń boıynda patrıottyq sezimdi oıatý maqsatynda ótken basqosýǵa ana tilimizdiń birden-bir janashyry, ulttyq rýh jarshysy bolyp tabylatyn «Ana tili» gazetiniń ujymy qatysty. Dóńgelek ústeldi qazaq fılologıasy jáne álem tilderi fakúltetiniń dekany, fılologıa ǵylymdarynyń doktory Altynaı Tymbolova júrgizip otyrdy.
Jıyn barysynda «Ana tili» gazeti redaksıasynan kelgen ókilder men Qazaq memlekettik qyzdar pedagogıkalyq ýnıversıtetiniń qazaq til bilimi kafedrasynyń ǵalymdary men stýdentteri qoǵamdaǵy til máselesine qatysty ózekti problemalar jaıynda, ulttyq bolmysymyz, ulttyq sana-sezim týraly, «Ana tili» gazetiniń betinde jaryq kórgen til men dilge qosa – mádenıet, ádebıet, rýhanıat máseleleri jaıynda oı órbitip, pikirlerin ortaǵa saldy.
– Keshegi A.Baıtursynov, Á.Bókeıhanov, M.Dýlatov syndy Alashtyń ardaqtylary til týraly: «Til – ulttyń jany, til bolmasa ult ta, halyq ta bolmaıdy» degendi kezinde aıtty, – dep sóz bastaǵan «Ana tili» gazeti redaktorynyń birinshi orynbasary Nurperzent Dombaı, – bul sózdiń astarynda úlken oı jatyr. Qazirgi tańdaǵy tildiń jaǵdaıy barshaǵa jaqsy belgili. Keńestik dáýirge qaraǵanda, qazirgi kezde tilimizdi damytýda ilgerileý bar. Oǵan jyl saıyn qazaq mektepteri men qazaq balabaqshalar sanynyń kóbeıýi dálel bola alady. Qazaq tilindegi gazet-jýrnaldardyń, BAQ-tyń da táýelsizdik alǵannan keıin qalaı óskenin bilesizder. Negizi, tildiń máńgilik bolýyna degen umtylys, tilge degen qushtarlyq balabaqshadan, mektepten bastalady. Sondaı-aq, tildi damytýda BAQ-tyń orny da erekshe. 1990 jyly jaryq kórgen «Ana tili» gazeti bıyl 25 jyldyǵyn atap ótti. Gazet halyqtyń qalaýymen, memleketimizdiń qoldaýymen ashylǵan bolatyn. Onda ár jyldary tanymal tulǵalar qyzmet etti. Búginde basylym qoǵamdyq úndi jetkizetin, til máselesine erekshe mán beretin, memlekettik til ǵana emes, ultqa qatysty kez kelgen kúrmeýli máselelerdi kóterip kele jatqan gazet bolyp otyr, – dedi.
Odan keıin sóz alǵan qazaq til bilimi kafedrasynyń meńgerýshisi, fılologıa ǵylymdarynyń doktory Qalamqas Qalybaeva elimiz táýelsizdik alǵan sonaý qıyn-qystaý zamannan beri «Ana tili» gazetiniń tek memlekettik til ǵana emes, ultqa qatysty kez kelgen kúrmeýli máselelerdi kóterip kele jatqandyǵyn, qazaqtyń tili, qazaqtyń aýyly, qazaq mektebi, balabaqshasy, qazaq jastary, qazaq ǵylymy, t.b. kóptegen taqyryptarda jazylǵan maqalalardyń oqyrman oıynan shyǵyp júrgenin atap ótti.
Jıynǵa stýdentter de belsene qatysyp, tilge baılanysty óz oı-pikirlerin bildirdi. Qazaq fılologıasy jáne álem tilderi fakúltetiniń 2-3 kýrs stýdentteri Aǵymjan Erkinbekova, Mádına Begarysova, Raýshan Baıjaryqqyzy, Aqerke Baýyrjan, Aqtoty Saparaly, Aıdana Ibraıymova, Altynaı Qanybek gazet betindegi maqalalar toptamalaryna taldaýlar jasap, ózindik pikirlerin aıtyp, memlekettik tildiń damýyn tejep turǵan kedergiler, úsh tuǵyrly til jóninde suraqtar qoıyp, tildi qorǵaý, tildiń qoldaný aıasyn keńeıtý, memlekettik tildiń mártebesin arttyrýǵa baılanysty usynys-tilekterin jetkizdi.
Derekkóz: Egemen Qazaqstan
