TARAZ. 3 qarasha. Jambyl oblysy Baızaq aýdanyndaǵy «Aǵalı» sharýa qojalyǵy jańa sút óńdeý sehyn iske qosty. Jergilikti sharýalardan sút satyp alyp, ony qaıta óńdep, aırannan bastap, qaımaq, súzbe men ózge de sút ónimderin shyǵarýmen aınalysatyn seh Qostóbe aýyldyq okrýgindegi Talas aýylynan ashyldy. Bul týraly egemen.kz tilshisi habarlady.
Jalpy quny 40 mln. teńgege baǵalanǵan seh qarjysynyń 30 mln. teńgesi ekinshi deńgeıli «Evrazıalyq bankten» alynsa, 10 mln. teńgesi óz qarajaty esebinen. Jańa óndirispen shuǵyldanýdy nıet etken sharýa qojalyq jetekshisi aýdandy ǵana emes, oblys óńirin de sapaly sút ónimderimen qamtýdy kózdep otyr.
Jambyl oblysy ákiminiń orynbasary Abdaly Nuralıevtyń aıtýyna qaraǵanda búgingi kúni óńirde aýyl sharýashylyq ónimderin qaıta óńdeıtin 200 kásiporyn jumys isteıdi, onda 2700 adam jumyspen qamtylǵan.
«Sút óńdeý sehynyń ashylýynan óńirimiz úshin tek ıgilik kútemiz. Sebebi, súttiń ózin ǵana satqannan, ony óńdep satý qaı tarapqa da tıimdi. Birinshiden, ónim túri molaıady, ekinshiden, halyq suranysyn qamtamasyz etemiz, eń bastysy, jańa jumys oryndary ashylady, aýdan búdjetine túsetin salyq ta bar», – deıdi A.Nuralıev.
Aldaǵy ýaqytta sehtyń qýattylyǵyn arttyrýmen birge, jumys oryndaryn da kóptep ashý josparlanǵan. Bul eki qolǵa bir kúrek taba almaı, jumys izdep júrgen aýyl turǵyndary úshin óte qolaıly joba boldy. Jobanyń artyqshylyǵy – seriktestiktiń óz mal bazasynyń bolýynda, sútti sıyrlar ustap, sútin óńdeýdiń tolyq sıklinde jáne daıyn sút ónimderin shyǵarýynda. Bul degenimiz – árıne, ónimniń ózindik qunynyń tómen bolýy. Ózi shyǵarǵan sútti ózi óńdep satý ónim baǵasynyń retsiz kóterilmeýine septigin tıgizedi.
«Sút ózimizden shyǵady. Qazirdiń ózinde sharýa qojalyqtaǵy 400 bas múıizdi iri qaranyń 227-i analyq bas sıyr. Qajetti mal azyǵy bazasyn saldyq. Mal azyǵy retinde bıyl qosymsha júgeri ósirip jatyrmyz. Aldaǵy ýaqytta saýylatyn sıyrdyń sanyn kóbeıtýdi josparlap qoıdyq. Ázirge ózimizde óndiriletin sútke qosymsha jergilikti turǵyndardan sút satyp alýdy kózdep otyrmyz», – dedi «Aǵalı» sharýa qojalyǵynyń basshysy.
Derekkóz: Egemen Qazaqstan
