Memleket basshysy Nursultan Nazarbaev Qazaqstan Respýblıkasy Parlamentiniń Senatyna úndeý joldady, dep habarlady Prezıdenttiń baspasóz qyzmeti.
Memleket basshysy óz ún­deýinde Q.Kelimbetovti Ult­tyq Bank tóraǵasy laýazymynan bosatý týraly sheshim qabyl­danǵanyn má­lim­dedi. Qazaq­stan Respýblıkasy Konstı­týsıasynyń 44-babynyń 4-tarmaǵyna, 55-babynyń 2-tar­maqshasyna sáıkes, Nursul­tan Nazarbaev Ulttyq Bank tór­aǵasy laýazymyna Prezıdenttiń kómek­shisi qyzmetin ýaqytsha atqarýshy – Prezıdent Ákimshiliginiń Áleýmettik-ekonomıkalyq monıtorıń bóliminiń meńgerýshisi Danıar Aqyshevty taǵaıyndaýǵa kelisim berý jóninde Parlament Senatyna ótinish joldady.
Nursultan Nazarbaev D.Aqy­shevtiń biliktiligin jáne mol tájirıbesi bar ekenin atap ótti.
– Ol Qazaq memlekettik bas­qa­rý akademıasyn úzdik bitirgen. 18 jyldan astam ýaqyt Ulttyq Bank­­te eńbek etti, sonyń jeti jy­lynda tóraǵanyń orynbasary boldy. Qazirgi ýaqytta Pre­zı­dent Ákimshiliginde qyzmet isteı­di, elimizdegi ahýal men eko­no­mı­ka­lyq máselelerdi jan-jaq­ty zer­de­leı biledi, – dedi Mem­leket bas­shysy.
Qazaqstan Prezıdenti Ulttyq Bank basqarý júıesiniń, ásirese, memlekettik qarjyny basqarýdyń mańyzdy elementi bolyp tabylatynyn aıtty.
– Qazir bankke jáne ulttyq valúta – teńgege degen senim azaıdy, buǵan jol berýge bolmaıdy. Elde teńge ótimdiliginiń tapshylyǵy seziledi, ekonomıkany nesıeleý kólemi tómendeýde. Bular – tómen kór­setkishter, olardy túzetý úshin jumys isteý kerek. D.Aqyshevtiń bili­mi men tájirıbesi oǵan osy min­detti atqarýǵa septigin tıgizetinine senimdimin. Parlament Senatynan eldiń qarjy júıesiniń ıgiligi úshin meniń osy sheshimimdi qoldaýdy suraımyn, – dedi Nursultan Nazarbaev.
Memleket basshysy otandyq ekonomıkanyń jaǵdaıyna birqatar faktorlar yqpal etetinin aıtty. Olardyń qatarynda negizgi eks­porttyq taýarlar baǵasynyń tómendeýin, álemdegi geosaıası jaǵ­daıdy, sondaı-aq, Qytaıdaǵy eko­nomıkalyq ahýaldy ataýǵa bo­lady.
– Biz bul qaterdiń bárin eń­se­remiz, ol úshin qajetti múm­kin­dik­ter bar, josparlar ázirlengen. Qazaqstannyń memlekettik qaryzy tómen deńgeıde. İJÓ-niń 40 paıyzy kóleminde rezervterimiz bar, eger sony tıimdi paıdalanatyn bolsaq, ekonomıkanyń damýyn jalǵastyra alamyz jáne halyq­tyń áleýmettik kóńil-kúıiniń nashar­laý­yna jol bermeımiz. Biz júr­gizip jatqan ındýstrıalan­dyrý jáne «Nurly Jol» ınfraqurylymdyq baǵdarlamasy syrtqy teris yq­pal­dardyń áserin azaıtýǵa baǵyt­tal­ǵan. Barlyq ónerkásiptik iri kásip­­oryndarǵa taǵy da sóz arnaı otyryp, jumys oryndaryn saq­taýdy qamtamasyz etýge shaqy­ra­myn, – dedi Qazaqstan Prezıdenti.

Derekkóz: Egemen Qazaqstan