Keshe Úkimettiń keńeıtilgen otyrysynda «Samuryq-Qazyna» ál-aýqat qorynyń basqarma tóraǵasy Ómirzaq Shókeev baıandama jasap turyp, Elbasyǵa qor jumysyndaǵy oryndaýshylyq tártibine qatysty shaǵymdandy. Kóptegen aqparat quraldary ál-aýqat qory basshysynyń bul áreketin kúlkige aınaldyryp, qaýqarsyzdyq dep baǵalap jatyr. Alaıda, bul oqıǵa qor basshysynyń qaýqarsyzdyǵynan buryn qordyń el ekonomıkasyndaǵy memlekettik qurylym retindegi ál-dármeni týraly túrli oıǵa jeteledi.

Qalaı bolǵanda da Ómirzaq Shókeev oıyndaǵysyn aıtamyn dep, júıelik kemshilikterdi ashyp qoıdy. Oǵan kóz jetkizý úshin Ómirzaq Shókeev pen Elbasy arasynda bolǵan dıalogqa qaıta bir kóz júgirtsek:

-Aqsha bar kezde qordyń ókildikteri balalap ketti. Álem boıynsha «Samuryq-Qazynanyń» 36 ókildigi bar eken. Qazir solar bir-birine kedergi keltirip, durys jumys júrip eatqan joq. Men olardyń sanyn úsheýge deıin qysqartyp, London, Beıjiń jáne Máskeýde ǵana qaldyrýdy usynamyn. Osy úsheýimen-aq qalypty jumys isteýge bolady. Ol úshin bizdiń qorǵa tártip kerek. Bizdiń ózgerister týraly aıtqandarymyz der kezinde jáne joǵarydan tómen oryndalýy úshin.

-Ol tártipti kim ornatady?

-Ózgerister degende men ózimde joǵarydan barlyq holdıń boıynsha ókim túsirý quqym bolsa degendi aıtyp otyrmyn.

-Jańaǵy óziń aıtqandar boıynsha ma? Seni eshkim tyńdamaı ma sonda?

-Tyńdamaǵanda bylaı ǵoı. Mysaly men bir jyl buryn ókildikter boıynsha basqarma sheshimin shyǵardym. Biraq, túrli sebeptermen ol ókildikter áli jabylmaı otyr. Bul mysal ǵana...

-Sen jassyń. Bilimiń bar, kúshiń tasyp tur. Saǵan laýazym, ókilet berdik. Sen eshkim tyńdamaıdy deısiń. Tyńdaýdyń ózi uıat muny. Kim seni tyńdamaı júr. Aıt. Men pármen bereıin. Kim?

-....

-Ómirzaqty «Samuryq-Qazynada» kim tyńdamaı júr?

-Nursultan Ábishuly, bul jerde kóptegen múddeler bar... Maǵan Sizdiń biraýyz sózińiz ǵana kerek...

Mine, osy jerdegi Ómirzaqtyń «Munda úlken múddeler bar», «Sizdiń biraýyz sózińiz ǵana kerek» degenine nazar aýdarǵan eshkim bolmaǵan sıaqty. «Samuryq-Qazyna» qorynyń quramynda úlken qarajatqa ıe alyp kompanıalar bar, alyp kompanıalardy basqaryp otyrǵan alpaýyttar bar. Ómirzaqty solar shyryldatyp otyrýy múmkin.

Negizgi maqsaty uzaq merzimdi qundylyqtaryn kúsheıtý jáne álemdik naryqta básekege qabilettiligin arttyrý úshin ulttyq damý ınstıtýttarynyń, ulttyq kompanıalar men basqa da zańdy tulǵalardyń ózine menshik quqyǵynda tıesili aksıalar paketterin (qatysý úlesterin) basqarý negizgi maqsaty bolyp tabylatyn qor quramynda ne joq deısiz?! Munda munaı-gaz, metalýrgıa, energetıka, ınfraqurylym, hımıa, munaı hımıasy syndy san salada qyzmet etetin kompanıalar men aktıvter bar.

«Samuryq-Qazynanyń» saıtynda qor qyzmetiniń negizgi qaǵıdattary mynalar bolyp tabylady dep kórsetilgen:

1. Qordyń jalǵyz aksıoneri retinde memlekettiń múddelerin saqtaý ;
2. Qordyń jáne onyń kompanıalary qyzmetiniń ashyqtyǵy, tıimdiligi jáne ıkemdiligi ;
3. Sheshimder qabyldaýda jáne olardy iske asyrý kezinde júıelilik jáne shuǵyldyq;
4. Jaýaptylyq jáne eseptilikte bolý.

Iaǵnı, qor basshysy bar bolǵany memleket múddesi úshin sheshim qabyldaý, ony júıeli jáne shuǵyl túrde júzege asyrý boıynsha uıymnyń Jarǵylyq erejeleriniń saqtalmaı otyrǵanyn meńzep otyr. Ó. Shókeev aıtqan ol  «múddeler» qandaı múdde, kimniń múddeleri? Nege ol múddeler qor jumysyna, sol arqyly memlekettiń múddelerine kedergi keltirýi kerek?!

Keńeıtilgen jıynda aıtylǵan «Samuryq-Qazyna» basshysynyń bul janaıqaıy aıtylǵan kúıi qalyp qoımaıdy, bıliktiń joǵary deńgeıinde tıisti sheshimder qabyldanady dep úmittenemiz.

Darhan Muqan