Basym bóligi «Nur Otandyqtardan» turatyn Parlament Májilisi kútilgendeı «oılamaǵan jerden» ózderin taratyp tyndy. Partıa jetekshisi muny qoldap, kezekten tys saılaý belgiledi. Búgin bas partıadan sol saılaýǵa qosylatyn úmitkerlerdiń de esimi belgili bola bastady.
İshinde kimder joq deısiz, shirkin! Ánshi de, sportshy da, kásipker de, ákim de, bári bar. Bolsyn. Parlamentte tek zańgerler nemese sheneýnikter otyrsyn degen zań joq. Ondaı talap eldegi basty laýazym prezıdenttike de qoıylmaıdy. Másele, osy usynylyp jatqan azamattardy partıa tizimine, partıa bolǵanda da qubylý ereksheligi eshbir teoremamen ólshenbeıtin, basym daýys ıelený yqtımaldyǵy óte joǵary saıası uıymnyń tizimine qosýdaǵy maqsatta bolsa kerek. Óıtkeni, joǵary jaqtaǵylarǵa, qazaq bıligin ashsa alaqanynda, jumsa judyryǵynda ustaıtyn yqpaldy toptarǵa oılaǵanyn iske asyrýǵa kedergi jasaıtyn, shyryldaǵan shyndyqty aıtatyn, bylaısha aıtsaq, qyryq adam bir jaq bolyp otyrǵanda bura tartatyn «qyńyr» depýtat esh kerek emes. Al, Úkimet alpaýyttardyń aranyna yńǵaılap jasap ákelgen zań jobasyn únsiz maquldap, aldyndaǵy qajetti túımeni basyp qana otyra beretin depýtatty qaıdan tabasyz? Árıne, ataq-dárejesin aıtpaǵanda, paıym-parasaty, ómirlik tájirıbesi, qyzmet joly «halyq qalaýlysy» degen bul abyroıly orynǵa laıyq emes jandardyń ishinen tabasyz! Kez-kelgen jerde biliktiligi tómen mamandy tuqyrtyp otyrý ońaı. Ol basshynyń da, basqanyń da aıtqanynan shyqpaıtyn bolady. Óıtkeni, sebebi belgili - aıtatyn sózi, sóz túgili, qalyptasqan belgili-bir oıy joq. Myna májilisti de áldekimder sondaı depýtattardan jasaqtaýdy jón kórgen sıaqty. Áıtpese, san salaly saıasatty aıtpaǵanda, mýzykalyq biliminiń ózi tolyq emes ánshi men sportty jarty joldan tastap ketip, sheneýnik atanǵan «juldyzdardy» májiliske súıreýdiń qajeti ne edi?
Keshegi Saılaýbekteı dıýana keıipti pendelerdi saıasat sahnasyna jaqyndatý týraly áńgime de osyndaı oıdan týǵan. Saılaýbek – qural. Kórnekilik quraly. Halyq Saılaýbekten góri Qaırat Nurtasty, reń-basy ádemi Sápıev pen Duǵalovany jyly qabyldasyn degen quıtyrqy amal. Sondaı maqsatpen bas partıanyń sezinen birer apta buryn qoǵamǵa Saılaýbek taqyryby talqyǵa usynyldy. Bárimiz shýladyq kelip. «Súıikti» bıligimiz, «ádilet súıgish» partıamyz qashanǵy ádetine saı «ádildik» kórsetti, «tereńdik» tanytty. «Daýǵa» núkte qoıdy. Qoǵam qabyldamaǵan Saılaýbek bas partıanyń tiziminde bolmaı shyqty. «Nur Otan» «Osyǵan rıza bolyńdar!» demese de, ol pıǵylyn uqtyq. Parlamentti qoıyp, prezıdent saılaýynyń ózin shapan kıgen kloýn Amantaı qajy, kishi dáretin quıǵan ydystan as ishetin Aıgúl Ótepovalardy qosyp saıqymazaqqa aınaldyrǵan qazaqstandyq saıası tehnologtardyń bul las oıyndary bizge tańsyq emes. Tek, osy saılaýlardan saıqymazaq jasaýdan kim ne utady degen suraqtyń mazalaıtyny bolmasa.
Jalpy, osy jerde aıta ketetin taǵy bir másele bar. Eldegi saıası uıymdar óner adamdaryn, sol tóńirektegi bılikke ońtaıly basqa da tulǵalardy saıası oıyndarǵa jıi paıdalanyp turady. Kezinde halyqtyń súıikti ánshisi Nurlan Ónerbaevty, jyrshy Bekbolat Tileýhanovty da májilis partasynan kórgenbiz. Aldyńǵy shaqyrylymdardyń birinde akter Qudaıbergen Sultanbaev marqum da depýtat boldy. Sol kisiniń aıtqan: «Parlamenttegilerdiń bári – ártis. Solardyń ishinde meniń ǵana ártis degen dıplomym bar» degen sóz áli kúnge umytyla qoıǵan joq. Bul joly da zań shyǵarýshy organǵa biraz «ártister» jınalmaq.
«Nur Otan» májilis saılaýyna usynatyn tizimine 127 adamdy qosypty. Májiliste partıalyq tizim boıynsha saılanatyn barlyǵy 98-aq oryn baryn bilemiz. Endigi másele, álgi ártister men sportshylar qaýymynyń sol tizimde 99-shy bolyp turmaýynda. Partıa jetekshileri juldyzdarǵa osy qasıetti «toqsan toǵyzynshy» oryndy belgilep berýi de múmkin. Mundaı da bolady. «Aqjol» partıasynyń qaıbir jylǵy saılaýaldy nasıhat kezinde el tanıtyn, halyq qurmetteıtin Amangeldi Aıtaly, Qazybek Isa syndy tulǵalardyń atyn paıdalanyp, jeme-jemge kelgende parlamentke Perýashevtiń kásipker serikteri ǵana ótkenin bilemiz, óıtkeni.
Sonymen, saıası dodanyń alǵashqy qadamyn bılik partıasy bastap berdi. Endigisin kóre jatarmyz.
Jomart Abdollauly
