Búgin Astanada ótip jatqan «Nur Otan» saıası partıasynyń kezekten tys XVII sezinde Májilis depýtattyǵyna úmitkerlerdiń partıalyq tizimi bekitildi. Oǵan respýblıkaǵa belgili saıasatkerler, qoǵam qaıratkerleri, sportshylar men óner ıeleri endi, - dep habarlaıdy "Qamshy" portaly..
Eske sala keteıik, Májilis depýtattarynyń sany 98 adamdy quraıdy. Alaıda, partıalar osy sanǵa qosymsha 30 paıyzǵa úmitkerler tizimin arttyryp, bekite alady. Soǵan baılanysty partıalyq tizimde 127 adam qamtylǵan, bul kandıdattardyń tizimi «Nur Otan» partıasynyń Saıası Keńesinde aldyn ala maquldanǵan.
Úmitkerler arasynda besinshi shaqyrylymnyń birqatar depýtattary, birqatar oblys ákimderi, mınıstrler men Úkimet músheleri, sportshylar men ánshiler de bar.
Máselen, partıalyq tizim boıynsha belgili boksshy Gennadıı Golovkın men álem jáne olımpıada chempıondary Serik Sápıev, Ilá Ilın endi. Sonymen qatar, elimizdiń tanymal ánshileri Qaırat Nurtas pen Janar Doǵalova, Aıman Musaqojaevalar ótti. Birqatar mınıstrler men ákimder, ulttyq kompanıa basshylary da partıalyq tizimge engen. Máselen, mınıstrler arasynda Arystan Muhamedıuly, Baqyt Sultanov, Úkimet basshysynyń orynbasary Darıǵa Nazarbaeva, QR Prezıdenti Ákimshiliginiń Basshysy Nurlan Nyǵmatýlınder de bar. Oblys ákimderi, solardyń ishinde Berdibek Saparbaev, Sergeı Kýlagın, Alık Aıdarbaev, Amandyq Batalov, Danıal Ahmetovter endi.
Ulttyq sport túrleri qaýymdastyǵynyń prezıdenti Bekbolat Tileýhan, Ulttyq mýzeı dırektory Darhan Myńbaı, «Astana EKSPO-2017» UK prezıdenti Ahmetjan Esimov, akter Nurlan Álimjanov ta bul tizimniń ishinde bar bolyp shyqty.
