Jambyl oblysynda oqys oqıǵa oryn aldy. Mektep oqýshysyna qol kóterdi degen kúdikke ilingen muǵalimge qatysty Qylmystyq kodekstiń «Kámeletke tolmaǵan adamdy tárbıeleý jónindegi mindetterdi oryndamaý» baby boıynsha is qozǵaldy. Jańatas qalasyndaǵy Abylaıhan orta mektebiniń segizinshi synyp oqýshysy aýrýhana tósegine tańylǵan. Ata-ana buǵan muǵalim kináli deıdi. Al mektep ujymy tájirbıeli ustazdyń oǵash qylyq kórsetken jeri joq degendi alǵa tartýda, - dep habarlaıdy "Qamshy" portaly "Astana" arnasyna silteme jasap.   

«Tarıh páni muǵaliminen taıaq jedim» degen Dıas qazir qozǵalýdan qalǵan. Ájetke jarap qalǵan balany ájethanaǵa aparý úshin anasy osylaı azaptanady. Dıastyń aıtýynsha, bul oqıǵa 25 qańtar kúni sońǵy sabaqta bolǵan. 

Dıas Dáýrenbaev, oqýshy: 

Qońyraý boldy da, bas kıimimdi alyp jatqanmyn, birimiz kıinip jatqanbyz. «Men senderge otyryńdar dedim ǵoı» dep, meni ıterip jiberdi, stoldyń buryshyna baryp tıdim. Qatty ıterip jiberdi ǵoı.  

Gúljanar Ábdirásilova, anasy: 

Aǵaıy ıterip, uryp, quıymshaǵyn syndyryp jibergen. Ózi júgirip júrgen bala ǵoı. Jaǵdaıy jatysy osy. Bir aıaǵyn siltip basatyn bolady deıdi.  Endi ol adamdy keshirýge bolmaıdy dep oılaımyn zań aldynda. 

Degenmen, dárigerler Dıastyń densaýlyǵy jaqsaryp kele jatqanyn aıtady. Oǵan segiz kózi synǵan degen dıagnoz qoıylypty. 

Qaırat Ájibekov,  Sarysý aýdandyq ortalyq aýrýhanasy hırýrgıa bóliminiń meńgerýshisi: 

Segizkózdiń jabyq synýy. Mindetti túrde jaraqattan bolady ol. Ózinen ózi bolmaıdy ǵoı ol. Operasıa jasalmaıdy, endi biz naqty anyqtaý úshin kompúterlik tomografıa túsirýimiz kerek. 

Máseleniń anyq-qanyǵyn bilmek bolyp, Dıas oqıtyn mektepke bardyq. Tarıh pániniń muǵalimi Ardaq Nurmahanov, jan balasyna judyryq jumsap kórmegenmin, deıdi. 

Ardaq Nurmahanov, «Abylaı Han» atyndaǵy orta mekteptiń muǵalimi:  

Eshqandaı urǵan da joqpyn, soqqan da joqpyn. Shýlap ár partadan ár partaǵa otyrǵannan keıin men sońǵy partada bos turǵan orynǵa aparyp, «osy jerge otyr» dep ıyǵynan basqanmyn. Sóıtti de, meniń qolymdy qaǵyp jiberem dedi de, artynda turǵan partaǵa arqasyn urdy. Boqtady, sonda da ózimdi ustap otyrdym, ári qaraı sabaǵymdy ótkize berdim. 

Aýdandyq bilim bóliminiń basshysy balanyń sabaq úlgerimi men tártibi máz emes ekenin aıtty. 

İlıas Baımaǵambetov, Sarysý aýdany ákimdigi bilim bóliminiń basshysy: 

Sabaq ótýe múmkindik bermeıtin árekettermen aınalysyp júrgen bala. Mektepte tártibi tómen oqýshylardyń qatarynda. Tarıh pániniń muǵalimi ózi bıazy, sypaıy, oqýshylarmen qarym-qatynasy óte jaqsy. Bul ýaqytqa deıin teris áreketin biz kórgen emespiz. 

Baqyt Jumaǵulov, Sarysý aýdandyq ishki ister bólimi basshysynyń orynbasary: 

QR QK 140 baby, 2 bólimimenen qylmystyq is qozǵalyp, búgingi tańda tergeý amaldary júrip jatyr. Anaý kináli, mynaý kináli dep aıta almaımyz. Dıas Dáýrenbaev búgingi tańda İİB-inde esepte tur. Ol byltyrǵy qazan aıynda bireýdiń zańsyz avtokóligin minip ketken. 

Mektep muǵalimi búginde jumysyn istep júr. Al is sotqa jetip ustazdyń kinási dáleldense, ol 300 aılyq eseptik kórsetkishke deıingi mólsherde aıyppul tóleýi múmkin.