قازاقستان رەسپۋبليكاسى اۋىل شارۋاشىلىعى ءبىرىنشى ۆيسە-مينيسترى قايرات ايتۋعانوۆ ۇكىمەت وتىرىسى بارىسىندا اۋىل تۇرعىندارىن جۇمىسپەن قامتاماسىز ەتۋ شارالارى مەن اۋىلدىق جەرلەردە كووپەراسيانى دامىتۋ تۋرالى مالىمدەدى، - دەپ حابارلايدى Qamshy.kz پرەمەر-مينيستر سايتىنا سىلتەمە جاساپ.

ق. ايتۋعانوۆ اۋىل تۇرعىندارىن جۇمىسپەن قامتۋ جانە قايتا وڭدەۋ قۋاتتارىن جۇكتەۋ جەكە شارۋاشىلىقتار الەۋەتىن پايدالانۋ ەسەبىنەن جۇزەگە اسىرىلاتىنىن ايتتى. ق ر اشم وبلىس اكىمدىكتەرىمەن بىرلەسە وتىرىپ جانە ق ر ءدسادم جىل سوڭىنا دەيىن ناقتى مىندەتتەر مەن ينديكاتورلاردى انىقتايتىن ءۇشجاقتى قادامدىق جوسپارىنا قول قويدى.  سونىمەن قاتار، ءىس-شارالاردى جۇزەگە اسىراتىن جۇمىس توبى قۇرىلدى جانە وڭىرلەردە ءتۇسىندىرۋ جۇمىستارىن جۇرگىزۋ ءۇشىن قۇجاتتار پاكەتى دايىندالدى.

«28 شىلدە مەن 30 تامىز ارالىعىندا بارلىق وبلىستاردا، سونداي-اق ءبىرقاتار اۋدانداردا اۋىلدىق وكرۋگ اكىمدەرىنىڭ جانە اۋداندار اكىمدەرىنىڭ ورىنباسارلارىنىڭ قاتىسۋىمەن كەڭەستەر ءوتىپ، ءىس-شارالاردىڭ ىسكە اسىرۋ مەحانيزمى، كووپەراتيۆتەر قۇرۋدىڭ نەگىزى جانە قارجىلاندىرۋ شارتى جايلى ەگجەي-تەگجەيلى ءتۇسىندىرىلدى»، - دەپ حابارلادى ءبىرىنشى ۆيسە-مينيستر.

ق. ايتۋعانوۆ اكىمدىكتەرگە بەكىتكەن جوسپارعا سايكەس، اعىمداعى جىلدىڭ سوڭىنا دەيىن 150 اۋىل شارۋاشىلىعى كووپەراتيۆى قۇرىلاتىندىعىن ايتتى. ول 100 ءسۇت قابىلداۋ بەكەتى مەن 2 200-دەن استام وتباسىلىق بورداقىلاۋ الاڭىن بىرىكتىرەدى.

«وسى جىلدىڭ 15 قازانىنداعى جاعداي بويىنشا 42 ءسۇت قابىلداۋ بەكەتى جانە 3 200 وتباسىلىق بورداقىلاۋ الاڭى قۇرىلدى»، – دەدى ق. ايتۋعانوۆ.

سونداي-اق، ءبىرىنشى ۆيسە-مينيستر كووپەراتيۆ قۇرۋدا فورمالدى امالدى بولدىرماس ءۇشىن كووپەراتيۆكە جەكە شارۋا قوجالىقتارىن كوبىرەك تارتۋ ءۇشىن وندا كەم دەگەندە 20 قاتىسۋشى بولۋ مىندەتى قويىلعانىن مالىمدەدى.