ەكىباستۇز قالاسىنىڭ تۇرعىنى جانە ونىڭ قىزى ەسىرتكى ساقتاعانى ءۇشىن كىنالى دەپ تابىلدى، دەپ حابارلادى قازاقپارات.

پاۆلودار وبلىستىق قىلمىستىق ىستەر جونىندەگى ارنايى مامانداندىرىلعان اۋدانارالىق سوتىنىڭ ۇكىمىمەن 1955 جىلى تۋعان ك.ر اتتى ازاماتشا مەن ونىڭ 28 جاسار قىزى ق ر قك-نىڭ 297 بابى، 3 بولىمىندە قاراستىرىلعان قىلمىس بويىنشا كىنالى دەپ تابىلدى. سوت ولاردى 10 جىلعا باس بوستاندىعىنان ايىرۋ جونىندە جازا تاعايىندادى. ەندى قىلمىسكەرلەردىڭ مۇلكى تاركىلەنىپ، ولار جازاسىن جالپى تارتىپتەگى كولونيادا وتكىزەتىن بولادى. سوت وكىلدەرى سوتتالعان ازاماتشانىڭ نارەستەسىنىڭ بار ەكەندىگىن ەسكەرە كەلىپ، 1988 جىلى تۋعان ازاماتشاعا قاتىستى جازانى 5 جىلعا كەيىنگە شەگەرۋ جونىندە ءشاشىم قابىلدادى.

پاۆلودار وبلىستىق سوتىنىڭ باسپا ءسوز قىزمەتىنىڭ اقپاراتتارى بويىنشا، وتكەن جىلى ەكىباستۇز تۇرعىنى جەكە تۇرعىن ءۇيىنىڭ ايماعىندا ەسىرتكى ساقتاپ كەلگەن. ونداعى ماقسات- بولاشاقتا سول ەسىرتكىنى ساۋدالاۋ بولعان. 2016 جىلى ولاردى ءتارتىپ ساقشىلارى قۇرىقتادى. تەكسەرۋ بارىسىندا جەكە تۇرعىن ءۇيدىڭ ايماعىنان ءىرى كولەمدە گاشيش تابىلىپ، تاركىلەندى. ۇكىم زاڭدى كۇشىنە ەنگەن جوق.