وپپوزيسيالىق جالپىۇلتتىق سوسيال-دەموكراتيالىق پارتياسى (جسدپ) قازاقستان بيلىگىن زاڭدارعا ەنگىزىلگەن ازاماتتاردى ۋاقىتشا تىركەۋگە تۇرۋدى مىندەتتەيتىن جاڭا تالاپتاردى جويىپ، كوشى-قون ماسەلەلەرىن ىقتياتتى تۇردە شەشۋدى تالاپ ەتتى. بۇل تۋرالى «ازاتتىق راديوسى» حابارلادى.

پارتيا 10 قاڭتاردا تاراتقان مالىمدەمەسىندە كوشى-قون زاڭدارىنا ازاماتتاردى ۋاقىتشا مەكەنجايى بويىنشا تىركەۋگە تۇرۋدى مىندەتتەيتىن وزگەرىستەر ەش دايىندىقسىز، اسىعىس جانە مۇلدەم جوسىقسىز ەنگىزىلدى دەپ سانايدى.

پارتيا كوشى-قون وزگەرىستەرى قازاقستان كونستيتۋسياسىنىڭ 21-بابى مەن ازاماتتاردىڭ ساياسي جانە ازاماتتىق بوستاندىعىنا كەپىلدىك بەرەتىن حالىقارالىق پاكتىگە اسەر ەتىپ وتىر دەيدى.

"اسىعىستىق سالدارىنان حالىققا قىزمەت كورسەتۋ ورتالىقتارىندا حالىق ىعى-جىعى بولىپ، پوليسيا قىزمەتكەرلەرى مەن شەنەۋنىكتەر بىلىكسىزدىگىن كورسەتتى" دەگەن جسدپ ۇكىمەت پەن پارلامەنت ۋاقىتشا تىركەۋ تۋرالى شەشىمدى مۇقيات ويلانباي، جاۋاپكەرشىلىكسىز قابىلداعان دەپ سانايدى.

جسدپ تىركەۋ ماسەلەسى اۋىل شارۋاشىلىعىن دامىتۋ جانە جاڭا جۇمىس ورىندارىن اشۋ، قازاقستاننىڭ كەز-كەلگەن جەرىندە لايىقتى ءومىر سۇرۋگە مۇمكىندىك بەرۋ ارقىلى شەشىلۋى كەرەك دەيدى.

قاڭتاردىڭ باسىندا قازاقستاندا ازاماتتاردى ۋاقىتشا مەكەنجايى بويىنشا تىركەۋ تۋرالى كوشى-قون زاڭدارىنا ەنگىزىلگەن تۇزەتۋلەر كۇشىنە ەنگەن. ەندى تۇرعىلىقتى جەرىنەن تىسقارى جاققا ءبىر ايدان اساتىن مەرزىمگە بارعان ءار قازاقستاندىق مەملەكەتتىك باج سالىعى رەتىندە 227 تەڭگە تولەپ ءارى حالىققا قىزمەت كورسەتۋ ورتالىعىنا بارىپ ۋاقىتشا مەكەنجايى بويىنشا تىركەۋگە تۇرۋى ءتيىس. بۇل تالاپ قوناقۇيدە تۇرىپ، وزگە قالادا جۇمىس ىستەيتىن ادامدارعا دا، وزگە قالاداعى اۋرۋحانادا جاتىپ ۇزاق ەمدەلەتىن ادامدارعا دا قاتىستى. العاشقىلارىن ءقوناقۇي ورنالاسقان مەكەنجاي، ال ەكىنشىلەرىن ەمدەلەتىن ورنى بويىنشا تىركەيدى. بۇل تالاپتى ورىنداماعاندارعا جەتى اەك (ايلىق ەسەپتىك كورسەتكىش) كولەمىندە، ياعني 16 مىڭ تەڭگە ايىپپۇل سالىنادى.