«حابار» تەلەارناسى «قازاق ءۆالسىنىڭ كورولى»، كومپوزيتور ءشامشى قالداياقوۆتىڭ ءومىرى مەن شىعارماشىلىعىنا نەگىزدەلگەن «ءان-اعا» تەلەحيكاياسىن ءتۇسىرىپتى. ءتورت ءبولىمدى كارتينانى 21 قاڭتاردان باستاپ وسى ارنادان كورسەتىلمەك، دەپ حابارلايدى kaz.365info.kz
تۋىندىدا ءشامشىنىڭ جاس كەزىن سومداعان استاناداعى «جاستار» تەاترىنىڭ اكتەرى داۋرەن سەرعازين كارتينانى ءتۇسىرۋ كەزىندەگى قيىندىقتار مەن قىزىقتار تۋرالى اڭگىمەلەپ بەردى.
– ءشامشى قالداياقوۆ تاريحي تۇلعا، ومىردە بولعان ادام. سوندىقتان بۇل رولگە قالاي دايىندالدىڭىز؟
— ءشامشى اتامىزدىڭ ومىرىنە نەگىزدەلگەن فيلم تۇسىرىلەدى، ءسىزدى باستى رولدەردىڭ بىرىنە قاراستىرىپ جاتىرمىز دەگەن كۇننەن باستاپ، مازام كەتتى. ءتۇسىرۋ جۇمىستارىنا ەكى اي قالعاندا ۇيقىم دا بۇزىلدى. ويتكەنى بۇل وبرازدىڭ جاۋاپكەرشىلىگى وتە ۇلكەن. ول كىسىنىڭ كوزىن كورگەندەر بار، جانۇياسى، تۋىستارى ءتىرى. كومپوزيتوردىڭ بەينەسىن بارىنشا شىنايى ەتىپ بەرۋ كەرەك. سول ءۇشىن ۇزاق ۋاقىت دايىندالدىم، ءشامشى اتامىز تۋرالى كىتاپتاردى اقتارىپ، بەينەجازبالاردى قاراپ شىقتىم. ءبىراق ول كىسىنىڭ جاس كەزىنەن قالعان بەينەجازبالارى جوق، سوندىقتان ول قانداي ادام بولدى دەگەن سۇراقتار كوپ مازالادى. ءشامشى اتامىز تۋرالى ەستەلىكتەر، دوستارى جازعان ماعلۇماتتاردى كوپ وقىدىم. ەل اۋزىنان، ول كىسىنى كورگەن كىسىلەردىڭ اڭگىمەلەرىن تىڭداپ، ىشكى جان-دۇنيەسىن زەرتتەپ، زەردەلەدىك. حالىققا ەڭ ماڭىزدىسى ول كىسىنىڭ ونەرى، اندەرى.
– اكتەر داۋرەن مەن ءشامشىنىڭ اراسىندا ۇقساستىقتار بار ما؟
– ءار وبرازدان وزىڭە ۇقساس جەرلەردى تاباسىن، شامشىدە دە ءدال سولاي. بەينەڭنىڭ كەيبىر جاقسى قاسيەتتەرى، كەيبىر جامان قاسيەتتەرىن سالىستىراسىڭ. ءبىراق ءشامشى اتامىزدىڭ جامان قاسيەتتەرى بولدى دەپ ايتا المايمىن.
– ءتۇسىرىلىم كەزىندە قانداي قيىندىقتارمەن كەزىكتىڭىزدەر؟
– كينو – ۇلكەن ونەر، قيىندىقسىز بولمايدى. كارتينا شىنايى شىعۋ ءۇشىن ءتۇسىرىلىم بارىسىندا ازداپ ماندولينا ۇيرەنۋگە تۋرا كەلدى، گيتارا، دومبىرا، وسى اسپاپتاردى كينوعا ەنگىزۋ ءبىراز دايىندىقتى تالاپ ەتتى. ەڭ باستى قيىندىقتى اۋا-رايى تۋعىزدى. فيلمدە كوكتەم، جاز، قىس مەزگىلدەرىن كورسەتەمىز، الايدا ءتۇسىرۋ جۇمىستارى قىستا وتكەندىكتەن، كوپ قولايسىزدىقتار بولدى. دەگەنمەن ءبارى دە ءساتتى شىققان سياقتى. ونى تەلەحيكايانى كورگەن سوڭ باعالارسىزدار…
– «ءان-اعا» سەريالىندا جاندى داۋىستا ءان ورىندايسىز با؟
– ءتىرى داۋىستا كەرەمەت ءان ورىندايتىن ادام ەمەسپىن. ءبىراق تاريح بويىنشا، ءشامشى اعامىزعا سۋىق ءتيىپ، داۋىسىنان ايرىلىپ قالعان بولاتىن. سوندىقتان شىرقاپ ءان سالىپ تۇرعانىم شىندىققا جاناسپايتىن ەدى. سول سەبەپتى ءبىز كارتينادا ازداپ ىڭىلداپ، ءوز اندەرىن شاما-شارقىنشا ايتۋعا تىرىستىق.
جالپى، جوبا وتە قىزىق ءوتتى، تاريحي وبرازداردى سومداپ، اتسالىسقان ارىپتەستەرىمە العىس بىلدىرگىم كەلەدى. ءالى دە مازا، ءالى دە قورقىنىش ويدان كەتپەي تۇر. سەبەبى فيلم قالاي شىعار ەكەن، حالىقتىڭ باعاسى قالاي بولار دەگەن ويلار مازالايدى.
رەجيسسەرى: جاسۇلان پوشانوۆ
سەناريي اۆتورلارى: جايىق سىزدىقوۆ، مۇحامەد مامىربەكوۆ
كومپوزيتوردىڭ ءتۇرلى كەزەڭدەردەگى وبرازدارىن داۋرەن سەرعازينمەن بىرگە نۇربول مەيرامبايەۆ جانە مەيىربەك قاۋىمبايەۆ سومدادى.
تەلەحيكايانى 21 قاڭتاردان باستاپ ساعات 20.00-دە «حابار» ارناسىنان كورىڭىزدەر! 4 ءبولىمدى تاريحي دراما سەنبى جانە جەكسەنبى كۇندەرى ەفيرگە شىعادى.
