22 قاڭتار كۇنى الماتى قالاسىنداعى "قابىلداۋ ۇيىندە" قازاقتىڭ اياۋلى ۇلى، 50 جاسىندا ارامىزدان وزعان اسقار جاكۋلينگە تۋعان-تۋىستارى اس بەردى. 

مىڭ قارالى ادام جينالعان استىڭ تىزگىنىن بەلگىلى اقىن الماس احمەتبەك ۇلى ۇستادى. قازاق سالتى بويىنشا مارقۇمنىڭ جارى سوڭعى رەت جوقتاۋ ايتتى، اسقا جينالعان جۇرت اسقاردىڭ اعايىن-تۋىس باۋىرلارىنا توقتاۋ ايتتى.

اس بارىسىندا اسقار ءانۋار ۇلىنىڭ ءومىرى مەن قايراتكەرلىگى تۋرالى دەرەكتى فيلم كورسەتىلىپ، قيماس دوستارى، تۋىستارى وشپەس ەستەلىكتەر ايتىپ ەسكە الدى. اسقاردىڭ ىزگى ءىسىن جالعاپ، ورنىن ويسىراتپاي وتىرعان جارى جاينا جاكۋلينانىڭ «اسقار جاكۋلين اتىنداعى قايىرىمدىلىق قورى» اينالىسىپ جاتقان ىزگى ىستەر دە كورسەتىلدى. اسقار ومىردەن وزعان سوڭ كوپ وتپەي قۇرىلعان قايىرىمدىلىق قور اسقار ءانۋار ۇلى جازىلماي كەتكەن وبىر دەرتىمەن اۋىراتىن جاندارعا، بالالارعا كومەكتەسۋدى ماقسات تۇتادى. قور بۇگىنگە دەيىن ناۋقاستارمەن قاتار ءتۇرلى اۋرۋحانالارعا جيىنى 60 ميلليون تەڭگەدەن استام كومەك كورسەتىپ ۇلگەرگەن.

استا اسقار ءانۋار ۇلىنىڭ اتامەكەنى، ايىرىقشا سۇيەتىن اقسۋاتىنان، تارباعاتاي اۋدانىنان اتقا مىنەر ازاماتتار ارنايى كەلدى. تارباعاتاي اۋدانى اكىمى اتىنان كەلگەن اكىمنىڭ ورىنباسارى قايرات ماۋادينوۆ اسقار ءانۋار ۇلى 50 جاسقا تولعاندا ول كىسىگە "تارباعاتاي اۋدانىنىڭ قۇرمەتتى ازاماتى" اتاعىن بەرۋگە شەشىم قابىلدانعانىن، ءبىراق بۇل اتاقتى اسەكەڭنىڭ كوزى تىرىسىندە بەرە الماي، ومىردەن وزعان سوڭ تۋىسقاندارىنا تابىستاپ جاتقانىنان وكىنىش ءبىلدىردى. سونداي-اق، جاينا جاكۋليناعا شقو ءبىلىم دەپارتامەنتىنىڭ العىس حاتى تاپسىرىلدى.

2016 جىلى 2 اقپاندا اسىلدىڭ سىنىعى اسقار جاكۋلين بەيجىڭدە دۇنيەدەن وزعان ەدى. ول ءوز وسيەتى بويىنشا الماتىدا جەرلەندى.

اسقار ءوزى قىتايدا تۋىپ-وسكەن، ءبىراز جىل گەرمانيادا تۇردى. كەيىن قىتايعا قايتا كەلىپ، پەكيندە ۇلكەن جەكە مەنشىك قۇرىلىس كومپانياسىن قۇرىپ، ءىرى عيماراتتار تۇرعىزدى. باي بولدى، ۇيلەندى. سويتە تۇرا ءسابيلى بولار ساتتەرىندە پەكيندى، بايلىقتى ءبارىن تاستاپ، جارى جاينانى جەتەلەپ، تاۋەلسىز قازاقستانعا - الماتىعا ءبىرجولاتا ورالدى. ونىمەن سۇحباتتاس، سىرلاس بولعان ازاماتتار ونىڭ سونشاما تەرەڭ ءبىلىمدى ەكەنىن، ەلىنە، ۇلتىنا، ۇلتتىق مەملەكەتىنە دەگەن سۇيىسپەنشىلىگى شەكسىز ەكەنىن جانە ونىڭ بيىك مادەنيەتتى ءارى جايساڭ ازامات ەكەنىن بىلەدى. ول اتىمتاي جومارت،­ ۇلكەن مەسەنات ەدى. قازاقستانعا كەلگەننەن كەيىن، ول "اساي" دەگەن كومپانيا قۇرىپ،­ ونى بيىك قارجىلىق مەكەمەگە اينالدىردى. 

ەسكە سالا كەتەر بولساق،  اسقار ءانۋار ۇلىنىڭ تۋعان كۇنى 7 قاراشادا  جاينا جاكۋلينانىڭ جان جارىنا جازعان جۇرەكتى ەلجىرەتەر حاتى جاريالانىپ، وقىرماننىڭ ىستىق ىقىلاسىنا بولەنگەن.