وزبەكستان پرەزيدەنتى شاۆكات ميرزيايەۆ 25 قاڭتاردا ەلدىڭ العاشقى پرەزيدەنتى يسلام كاريموۆتى ماڭگى ەستە قالدىرۋ تۋرالى قاۋلى شىعاردى دەپ حابارلايدى ازاتتىق راديوسى.

قاۋلى بويىنشا، وزبەكستاندا بىرنەشە مەكەمە مەن نىسانعا، ونىڭ ىشىندە تاشكەنت مەملەكەتتىك تەحنيكالىق ۋنيۆەرسيتەتىنە، اساكتاعى كولىك قۇراستىرۋ زاۋىتىنا، فەرعاناداعى ونەر سارايىنا، تاشكەنتتەگى حالىقارالىق اۋەجايعا، قاراقالپاقستان، تاشكەنت پەن بىرنەشە قالالارداعى ورتالىق كوشەلەرگە كاريموۆتىڭ ەسىمى بەرىلمەك. قۇجاتتا سونىمەن قاتار سامارقاندا يسلام كاريموۆ جەرلەنگەن جەرگە مەموريالدى كەشەن تۇرعىزىلاتىنى ايتىلعان.

وتكەن جىلدىڭ سوڭىندا وزبەكستان بيلىگى كاريموۆكە ەسكرەتكىش تۇرعىزۋعا كونكۋرس جاريالانعان. ونىڭ قورىتىندىسى بويىنشا تاشكەنتتە، كاريموۆ تۋىپ-وسكەن سامارقاندا، قاشقاداريا وبلىسىنىڭ جەتەكشىسى بولىپ قىزمەت ىستەگەن كارشي قالاسىندا ەسكەرتكىشتەر ورناتىلاتىن بولعان.

ميرزيايەۆتىڭ جاڭا قاۋلىسى بويىنشا، وزبەكستاندا جىل سايىن 30 قىركۇيەكتە كاريموۆتىڭ تۋعان كۇنى تويلانىپ، 2 قىركۇيەك تۇڭعىش پرەزيدەنتتى ەسكە الۋ كۇنى كۇنى دەپ جاريالانادى. وزبەكستان بيلىگى مەملەكەتتىك باق-تى كاريموۆتى ەسكە الۋمەن بايلانىستى شارالاردان حابار تاراتۋعا مىندەتتەدى.

وزبەكستاندى 1989 جىلدان بەرى 27 جىلعا جۋىق ۋاقىت باسقارعان يسلام كاريموۆ 79 جاسىندا قايتىس بولدى. ونىڭ ءولىمى تۋرالى العاشقى حابار 2016 جىلى 29 تامىزدا شىقتى. كاريموۆتىڭ قايتىس بولعانى تۋرالى رەسمي تۇردە 2 قىركۇيەكتە حابارلاندى. كاريموۆتىڭ ولىمىنەن سوڭ پرەزيدەنت مىندەتىن ۋاقىتشا سول كەزدەگى پرەمەر-مينيستر شاۆكات ميرزيايەۆ اتقارىپ، كەيىن ول پرەزيدەنت بولىپ سايلاندى.