«قامشى» پورتالىنىڭ بەتىندە 2016 جىلدىڭ اياعىندا «قازاق ەلىن مەنسىنبەيتىن فۋتبوليست جۋكوۆ ۇلتتىق قۇراماعا قانشالىقتى كەرەك؟» دەگەن ماقالا جاريالانعان بولاتىن. قازاق فۋتبولىنىڭ جانكۇيەرى، ماقالا اۆتورى ەرنار المابەك ماقالاسىندا بىلاي دەپ كۇيىنەدى: «بەلگيالىق باسىلىمداردىڭ بىرىنە بەرگەن سۇقباتىندا ول: "مەن قازاقستان قۇراماسىنىڭ باپكەرىنە ماعان رەسمي ويىنداردا ءۇمىت ارتپاۋىن جەتكىزدىم. مەن وسكىم كەلەدى، سول سەبەپتى دە قاي قۇراماعا وينايتىنىمدى ءالى شەشپەدىم. مەنىڭ ەكى تاڭداۋىم بار – بەلگيا مەن رەسەي"، - دەگەنى جانكۇيەرلەردىڭ ءالى دە ەسىندە. سول سۇقباتتان كەيىن ويىنشى الەۋمەتتىك جەلىدە جۇرتپەن ءسوز تالاسقا ءتۇسىپ، ايىپپۇل دا تولەگەن بولاتىن. ءبىراق ول از بولعان سىڭايلى. ايتقان سوزدەرى ءۇشىن اقتالىپ، ءوزىن دۇرىس تۇسىنبەگەن ەلدەن كەشىرىم سۇراسا دا جۋكوۆ مۇنىمەن توقتاپ قالمادى. مىسالى، وسى جىلى شىلدە ايىندا رەسەيلىك championat.com پورتالىنا بەرگەن سۇقباتىندا ول: "شىنىمدى ايتسام، مەن العاشىندا قازاقستانداعى جىگىتتەر دە فۋتبول ويناي الاتىنىنا قاتتى تاڭعالدىم"، - دەگەن ەكەن. اشۋعا تيە مە؟ تيەدى، ارينە! بۇلاي ايتاتىنداي ول كىم ەدى؟ نەبارى 37 مىڭ حالقى بار ليحتەنشتەيندە دوپ تەبەتىن ادام تابىلعاندا، قازاقستاندا تابىلمايدى دەپ ويلادى ما؟ ءجا، كەلەسى پىكىرگە كوشەيىك. ءدال سول سۇقباتتا "تۋعان جەرىڭىزگە ورالعانداعى العاشقى ويىڭىز" دەگەن ساۋالعا بەرگەن جاۋابىن وقىڭىزدار: "اراعا ۇزاق ۋاقىت سالىپ، اكەم ەكەۋمىز قاراعاندىعا كەلگەندە: "مۇمكىن، كەش بولماي تۇرعاندا بۇل جاقتان قايتا كەتكەنىمىز دۇرىس بولار؟" دەگەنىم ەسىمدە"، - دەپتى. تۋعان جەردى اڭساپ كەلگەن ادامنىڭ پىكىرىنە ۇقسامايدى، ءا؟ championat.com – رەسەيلىك پورتال ەكەنىن ايتتىم عوي. سولارعا جاعۋدى ويلاسا كەرەك، ءسوز اراسىندا جۋكوۆ: "مەن ءوزىمنىڭ سپورتتىق ازاماتتىعىمدى رەسەيلىككە اۋىستىرعىم كەلەدى. ارتىنشا رەسەي ۇلتتىق قۇراماسىنا قوسىلۋ ءۇشىن بار كۇشىمدى سالامىن. بۇل – مەنىڭ ارمانىم!"، - دەگەنى بار». ماقالانى وقىعان وقىرمان دا جاعا ۇستاپ قالعانى انىق. قازاقستانعا دەگەن قۇرمەتى دە، سۇيىسپەنشىلىگى دە جوق سول جۋكوۆ «قايرات» فۋتبول كلۋبىنىڭ سايتىنا 180 گرادۋسقا وزگەرىپ سۇحبات بەرىپتى. ەندى ول «ەگەر مەنى ۇلتتىق قۇراماعا شاقىرسا، بار جان-تانىمەن بەرىلىپ قازاق ەلى ءۇشىن فۋتبول وينايمىن» دەپ اعىنان جارىلىپتى. مۇنداي «ۇلتجاندى» ازاماتتار قازاقستاننىڭ نامىسىن قورعاعاندا قازاق فۋتبولى جاري ما دەگەن سۇراق تۋىندايدى.

جازيرا بايدالى