قازاقستانداعى العاشقى جانە ازىرگە جالعىز ميتينگىمە بىلتىر جازدا قاتىستىم. ا.يلياشيەۆ 36-تالپىنىسىندا رۇقسات العان ميتينگىگە ق ر ازاماتى جانە ساياساتتانۋشى رەتىندە قاتىستىم.
ماعان ميتينگىشىلەرمەن قاتار اكىمشىلىك وكىلدەرىنىڭ، ءماسليحات دەپۋتاتتارىنىڭ، پوليسيانىڭ جانە ميتينگىنى باسىنان سوڭىنا دەيىن كامەراعا تۇسىرگەن، قارا كوزىلدىرىك تاققان، قارا سومكە اسىنعان ءبىر توپ جىگىتتىڭ ىس-ارەكەتىن باقىلاۋ كاسىبي تۇرعىدان قىزىق بولدى. سول كەزدە قارا كيىمدى جىگىتتەردىڭ ءجۇرىس-تۇرىسىنا قاراپ، ولاردى كنب، اكىمشىلىكتىڭ ىشكى ساياسات ءبولىمى نەمەسە اكىمشىلىككە قاراستى مەكەمەنىڭ قىزمەتكەرى بولۋى مۇمكىن دەپ بولجادىم.
اسيا تۋلەسوۆا “پوليسەيدىڭ فۋراجكاسىن ۇشىراتىن” مونتاجدالعان روليكتى ميتينگىدەن قالمايتىن سول قارا كيىمدى جىگىتتىڭ ءبىرى تۇسىرگەن بولۋى مۇمكىن دەپ ويلايمىن. ياعني، وتكەن سەنبىدە “ەليتاعا” تانىمال بەلسەندىلەردى جاعىمسىز كەيىپتە كورسەتۋگە كەرەمەت مۇمكىندىك تۋدى. پوليسەيلەر ادەتتەگىدەي ميتينگىشىلەرگە قىسىم كورسەتتى، "كارا كيىمدى وپەراتورلاردىڭ" جولى بولىپ، بەيبىت ميتينگىگە شىققان مەديادا اتى تانىمال بەلسەندىنىڭ ەموسياعا بەرىلگەن ءساتىن جاقسىلاپ ءتۇسىرىپ، ونى قارا نيەتتى كۋراتورلارىنا، ولار ونى ارى قاراي ارسىز يدەولوگتارعا وتكىزدى، ولار ونى فەيسبۋكتەگى جالدامالى پروپاگانديستتەرگە تاراتتى.
ودان كەيىنگى ساياسي رەپرەسسيا پروپاگانديستتەرىنىڭ جيىركەنىشتى ىس-ارەكەتىن فەيسبۋكتە ءبارىمىز كورىپ وتىرمىز. “ەليتا” ماسكاسى تالاي شەشىلىپ، بەتى ابدەن اشىلىپ كەتكەن جاندايشاپتاردى نە ءۇشىن الەۋمەتتىك جەلىدەگى كەزەكتى پروپاگانداعا قولدانىپ وتىر؟
مەنىڭ ويىمشا، ونىڭ ەكى ماقساتى بار. بىرىنشىدەن، “ەليتا” وسى پروپاگاندا ارقىلى ا.تۋلەسوۆاعا قاتىستى سوتتىڭ شەشىمىن قوعامدىق جانە ساياسي ديسكۋرستا لەگيتيميزاسيالاۋدى جەڭىلدەتىپ، باتىس ەلدەرى مەن حالىقارالىق ۇيىمداردىڭ الدىندا ءوزىنىڭ بەيبىت ميتينگىلەردەگى رەپرەسسيۆ امالدارىن اقتاۋ ءۇشىن جاساپ وتىر. ەكىنشىدەن، ا.تۋلەسوۆانى وسىنداي رەزونانسپەن جازالاۋ ارقىلى قوعامداعى ساياسي بەلسەندىلەردى ۇركىتىپ، ازاماتتاردى ۇرەيدە ۇستاۋ ءۇشىن، ميتينگىنى اگرەسسيۆ ادامداردىڭ ەرمەگى دەپ كورسەتۋ ءۇشىن جاسالىپ وتىر. ياعني، الدا بولاتىن ميتينگىلەردە ءوز جۇمىسىن جەڭىلدەتىپ، ساياسي پروتەستتى “زاڭ ۇستەمدىگىن” ورناتۋ ارقىلى اۋىزدىقتاۋعا تىرىسۋدىڭ امالى.
الدا ا.تۋلەسوۆا جانە وزگە ساياسي بەلسەندىلەر “گوسدەپتىڭ اگەنتتەرى”، “شەتەلدىك گرانتتاردى يگەرۋ ءۇشىن ميتينگىگە شىعىپ ءجۇر”، “پياتايا كولوننا”، “لگبت-نى قولداۋ ارقىلى قازاقتى ازعىرۋشىلار” دەگەن ءداستۇرلى تىزەسى شىققان شابلوندارمەن پوستتار جازىلسا، تاڭ قالمايمىن. مۇمكىن جازىلىپ تا قويعان شىعار.
سوندىقتان ءدال ءقازىر “قارا كيىمدى وپەراتورلار” مەن ولاردىڭ كۋراتورلارى، ىشكى ساياساتتىڭ يدەولوگتارى مەن جالدامالى پروپاگانديستتەرگە قوعام رەتىندە ەسەيگەنىمىزدى دالەلدەيتىن كەز. ولاردىڭ ادامگەرشىلىكتەن ادا جانە يدەيالىق تۇرعىدان يمپوتەنت ەكەنىن دالەلدەيتىن كەز. ءدال ءقازىر بەتسىز پروپاگانديستتەر ساياسي بەلسەندىنى جازالاۋ ارقىلى “زاڭ ۇستەمدىگىن” تالاپ ەتەتىن كەز ەمەس. ءدال ءقازىر وسى ۋاقىتقا دەيىن جاپپاي ۇنسىزدىك پەن قورقىنىشتان جول بەرگەن كونستيتۋسيالىق قۇقىقتارىمىزعا قول سۇعۋدى “ەليتادان” توقتاتۋدى تالاپ ەتەتىن كەز.
ءدال ءقازىر ساياسي رەپرەسسياعا قارسى كۇرەسەتىن كەز.
