Qamshy.kz اقپارات اگەنتتىگىنىڭ جەتەكشىسى ءبىلال قۋانىش الەۋمەتتىك جەلىدەگى پاراقشاسىندا نۇرسۇلتان نازاربايەۆتىڭ پۋتينگە ۇلتتىڭ ۇلى مۇراسى سانالاتىن قامشىنى سىيلاۋى - ءقاۋىپتى نىشان ءارى ۇلكەن قاتەلىك بولعانىن جازادى. 

ول پاراقشاسىندا "قازاق باقتالاسىنا، ءباستالاسىنا، دۇشپانىنا استىنداعى اتىن بەرسەدە، قولىنداعى قامشىسىن سىيلاماس بولار ەدى. ەڭ جاقىن ەكى دوستىڭ سەرتتەسۋىندە عانا قامشى اۋىستىرىپ انتتاساتىن. ۇلتتىڭ ۇلى مۇراسى رەتىندە قوناعىڭا، سىيلاسىڭا قامشى سىيلاۋ - ارينە، قۇپتارلىق. ال ەلدىڭ كوشىن باستاعان كوسەمنىڭ ءىزباسارىنان باسقاعا ءوز قولىمەن قامشىنى بەرۋى - ءقاۋىپتى نىشان. 2018 جىلى سول كەزدەگى پرەزيدەنت نۇرسۇلتان نازاربايەۆ پۋتينگە التىنمەن اپتالعان، كۇمىسپەن قاپتالعان قامشى سىيلاپ، بولىنبەس دوستىعىن پاش ەتكەندەي بولعان. اراعا جىل سالماي، بيلىگىنەن ايىرىلدى. كەيىنىرەك «انتتاسقان انداسى» پۋتينگە بارعاندا، قۇرمەتتەن قاعىلىپ، لۋكاشەنكونىڭ قولتىعىندا كەتكەنىن كوزىمىز كوردى. كوپ وتپەي «بۇرق» ەتە قالعان “قاڭتار وقيعاسى”ەلباسى اۋلەتىنە قامشى بوپ ءتيدى. قامشى – بيلىك، قامشى – دەس، قامشى – نامىس. سەن قانشا دوس كورىپ سىيلاساڭ دا، قاس دۇشپان قامشىنى وزىڭە سىلتەيدى. 

كەشەلى بەرى نازاربايەۆتىڭ پۋتينگە بارعانى ءسوز بولىپ جاتىر. «قارا جۇڭگو قاپتاپ، سارى ورىس اكەڭدەي» كورىنسە دە، تاۋەلسىزدىگىمىزدى تارك ەتىپ، قيت ەتسە ماسكەۋگە ماڭىرايتىن قۇلاقكەستىلىكتەن قاشان قۇتىلارمىز؟! بيلىك ۇستاعاندار «ۇل بولساڭ قولىڭدا، قۇل بولساڭ توبەڭدە وينايتىن» قامشىنىڭ قاسيەتىن تۇپساناسىمەن تۇسىنسە نەتتى!.." دەپ جازادى.