قىتايدىڭ sina.com سايتى weibo پاراقشاسىنا «Singer-2017» ءان بايقاۋىنا قاتىسىپ جاتقان قازاقستاندىق ءانشى ديماش قۇدايبەرگەننىڭ بارابان اسپابىندا ونەر كورسەتكەن ۆيدەوسىن جاريالاندى، دەپ حابارلايدى قازاقپارات

جانكۇيەرلەر ديماشتىڭ ونەرىنە ءتانتى بولىپ، ناعىز تالانت يەسى، سەگىز قىرلى ءبىر سىرلى جىگىت دەپ باعا بەرگەن. ال 1 ناۋرىز كۇنى كەشتە جۇكتەلگەن ۆيدەونى تاماشالاعان ادامدار سانى 400 مىڭعا جاقىنداعان.

ايتا كەتەرلىگى، Weibo الەۋمەتتىك پاراقشاسىندا ديماشتىڭ پيانينودا جانە دومبىرادا كورسەتكەن ونەرىنە قىتايلىق جانكۇيەرلەرى ەرەكشە ءتانتى بولعان. ال جوبانىڭ التىنشى كەزەڭىندە ديماش ءوزى پيانينودا ويناپ، لارا فابياننىڭ «Adagio» ءانىن ايتقان بولاتىن.

بۇل كۇندە ديماشتىڭ Weibo الەۋمەتتىك پاراقشاسىنا تىركەلۋشىلەر سانى 2 ميلليون 500 مىڭنان استى.  

ەسكە سالا كەتەيىك، وتانداسىمىز بايقاۋدىڭ جەتىنشى كەزەڭىندە قازاق ۇلتتىق اسپاپتار وركەسترىنىڭ سۇيەمەلدەۋىمەن «دايديداۋ» ءانىن ايتادى. سونداي اق، ديماش ساحنادا دومبىرامەن ونەر كورسەتەتىن بولادى.

جەتىنشى كەزەڭ ەفيردەن 4 ناۋرىزدا كورسەتىلەدى.