پاۆلوداردا قىزىن ۆيدەوعا تۇسىرە وتىرىپ، ۇرىپ-سوققان ايەلگە كەشىرىم بەرىلدى، - دەپ حابارلايدى Tengrinews.kz
ءۇش جاسار ءايليندى ۇرىپ-سوققان اناسىنا قاتىستى قوزعالعان قىلمىستىق ءىس تاراپتاردىڭ تاتۋلاسۋىمەن جابىلدى.
"پاۆلودار تۇرعىنى ەرجان قاسىموۆ ازاماتتىق نەكەدەگى ايەلىنە شارا قولدانۋدى سۇراپ، ارىز جازعان. ول ارىزىندا ايەلى نۇرگۇل دوكۋوۆانىڭ ءۇش جاسار قىزدى ۇرىپ-سوعاتىنىن ايتقان. دوكۋوۆاعا قاتىستى سوتقا دەيىنگى تەرگەۋ "كامەلەتكە تولماعان ادامدى تاربيەلەۋ ءجونiندەگi مiندەتتەردi ورىنداماۋ" بابىمەن جۇرگىزىلدى. تەرگەۋ بارىسىندا ەر ادام دوكۋوۆامەن تاتۋلاسقانى جونىندە ءوتىنىش ءتۇسىردى. وسىعان بايلانىستى كۇدىكتىگە قاتىستى قىلمىستىق ءىس اقتالمايتىن نەگىزدەر بويىنشا توقتاتىلدى"، - دەپ حابارلادى وڭىرلىك پوليسيا دەپارتامەنتىنىڭ باسپا ءسوز قىزمەتى Tengrinews.kz رەداكسياسىنىڭ رەسمي ساۋالىنا بەرگەن جاۋابىندا.
ءوز بالاسىن ۇرىپ-سوعىپ، ۆيدەوعا تۇسىرگەن قاتىگەز اناعا قاتىستى ءىس قوزعالعانى بەلگىلى. ءبۇلدىرشىندى اناسىنىڭ اياۋسىز ۇرىپ-سوعۋى تۋرالى ۆيدەو Instagram الەۋمەتتىك جەلىسىندە جاريا بولعان ەدى. كادرلاردان ايەلدىڭ ءبۇلدىرشىندى ۆيدەوعا تۇسىرە وتىرىپ، بەتىنەن، باسىنان ۇرعانىن كورۋگە بولادى. كەيىن تاماعىنان قىسىپ، جىلاپ جاتقان بالانىڭ ءۇنىن وشىرگىسى كەلەدى. ايەل مۇنىسىمەن دە توقتاماي، ءبۇلدىرشىندى ۇرعىلاي بەرەدى. كادر سىرتىندا "انا، توقتات!" دەگەن تاعى ءبىر قىزدىڭ داۋسى ەستىلەدى. قىز شەشەسىن توقتاتپاق بولادى، ءبىراق اناسى ونىڭ سوزىنە قۇلاق اسپايدى.
كەيىن پاۆلوداردا قىزدى ۇرىپ-سوققان ۆيدەونى تاراتۋشى وقيعانىڭ ءمان-جايىن ايتىپ بەرگەن ەدى.
ەستەرىڭىزگە سالا كەتسەك، مىنا ۆيدەو الەۋمەتتىك جەلىدە كەڭىنەن تارالىپ، جۇرتشىلىقتىڭ اشۋىن تۋدىرعان بولاتىن.
