قازاقستان ەستراداسىنىڭ تانىمال ءانشى ايقىن تولەپبەرگەن  مەملەكەت باسشىسىنىڭ 40-قا جۋىق وكىلەتتىلىگىن ۇكىمەت پەن پارلامەنتكە بەرگەنىجونىندە ءوز ويىمەن ءبولىستى. 

ول ءوز جازباسىندا ەلباسى دۇرىس شەشىم قابىلداعانىن ايتادى. 

«ەلباسىن قولدايمىن، دۇرىس جاسادى! ءوزىنىڭ بيلىك تارماقتارىنىڭ كەيبىرىن مينيسترلەر مەن دەپۋتاتتارعا بەرەتىن بولدى. ەندى ءبىز ەلىمىزدە بولىپ جاتقان ءاربىر جاعداي تۋرالى ولاردان سۇراي الامىز. بۇرىنعىداي «بيىك دۋالداردىڭ» ارتىنا تىعىلا المايدى!»، - دەيدى ايقىن تولەپبەرگەن.

سونداي-اق، ەسترادا ءانشىسى ەلباسىنىڭ «جەر ماسەلەسىنە» قاتىستى شەشىمدى قابىلدار دا - حالىق جاعىنا شىققانىن قۋانا قابىلداپتى.

«اسىرەسە ەلباسىنىڭ "جەر ماسەلەسى" جونىندە xالىقتىڭ جاعىن قولداۋى قاتتى قۋانتتى. ەلىمىز امان، جۇرتىمىز تىنىش بولسىن اعايىن!»، - دەپ جازدى تانىمال ءانشى.

ايقىن تولەپبەرگەن ءوز ويىمەن Instagramالەۋمەتتىك جەلىسىندەگى پاراقشاسىندا ءبولىستى.

ءانشىنىڭ جەلىدە جاريالاعان پوستى ساعات سايىن ەمەس، سەكۋند سايىن تىڭدارماندارى تاراپىنان قولداۋ تابۋدا. پوست تەك ءبىر ساعاتتىڭ ىشىندە 9 مىڭعا جۋىق «لايك»، 100-دەن استام پىكىر جيناعان.  

ەستەرىڭىزگە سالا كەتەيىك، 1 ناۋرىز كۇنى مەملەكەتتىك بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى جۇمىس توبىنىڭ وتىرىسىندا قازاقستان رەسپۋبليكاسى كونستيتۋسياسىنىڭ قولدانىستاعى رەداكسياسىندا مەنشىك قۇقىعىنا قاتىستى 26-باپقا ۇسىنىلعان تۇزەتۋلەر تالقىلاندى. جۇمىس توبى مۇشەلەرى اتالعان نورماعا ۇسىنىلعان وزگەرىستەرگە قاتىستى حالىقتان ءتۇرلى ۇسىنىس تۇسكەنى تۋرالى ايتتى. نۇرسۇلتان نازاربايەۆ قازاقستان ازاماتتارىنىڭ پىكىرىن ەسكەرىپ، 26-باپقا وزگەرىس ەنگىزبەۋدى ۇسىندى.