بۇگىن «قازاقستان» رترك» اق مەن Clearwater Documentary Inc. كومپانياسىنىڭ بىرلەسكەن جوباسى – «EQUUS» (جىلقى) دەرەكتى تريلوگياسىنا قاتىستى مەموراندۋمعا قول قويىلدى. ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتى بارىسىندا ق ر اقپارات جانە كوممۋنيكاسيالار ءمينيسترى داۋرەن ابايەۆ قازاقستان ءۇشىن بۇل جوبانىڭ ماڭىزدى ەكەندىگىن اتاپ ءوتتى.
«ءبىز وسى جوبا ارقىلى ەلىمىزدىڭ ءيميدجىن كوتەرۋگە، مادەني كەڭىستىك مۇمكىندىكتەرىن كەڭەيتۋگە جانە عىلىمي زەرتتەۋ سالاسىن ودان ءارى دامىتۋعا ۇلەس قوسامىز. ءتۇسىرىلىمنىڭ نەگىزگى ماقساتى – قازاقستان جەرىن مەكەندەگەن ەرتەدەگى جىلقىلاردىڭ ءومىر ءسۇرۋ سالتى مەن ماتەريالدىق مادەنيەتىن ەڭ ۇزدىك عىلىمي جەتىستىكتەر نەگىزىندە زەردەلەۋ»، - دەدى مينيستر.
كەزدەسۋ بارىسىندا «EQUUS» (جىلقى) حالىقارالىق جوباسىنىڭ وندىرىستىك جۇمىستارى تالقىعا سالىندى. اتالمىش جوبا ەلىمىزدىڭ تاريحى مەن ءداستۇرىن قامتىپ، كينو جانە تۋريزم سالالارىن حالىقارالىق ارەناداعى ءيميدجىن قالىپتاستىرۋعا ىقپالىن تيگىزەدى.
ءتۇسىرىلىم جۇمىستارى بيىل باستالادى، 2018 جىلى اياقتالادى جانە قازاقستان اۋماعىندا وتەدى. وعان قازاقستاندىق كينەماتوگرافيستەر، اكتەرلەر، دۋبلەرلەر، ونەر جانە ديزاين سالاسىنداعى كاسىبي ماماندار تارتىلىپ، كانادالىق ءتۇسىرىلىم توبىمەن بىرلەسىپ جۇمىس ىستەيدى. قازاقستاندىق كينەماتوگرافيستەر ءۇشىن بۇل مول تاجىريبە عانا ەمەس، سونىمەن قاتار، عىلىمي دەرەكناما باعىتىندا رۋحاني-مادەني الماسۋ بولماق.
سونىمەن قاتار بۇل جوباعا كانادا (CBC)، اقش (PBS)، گەرمانيا (ZDF) جانە فرانسيا (ARTE) ەلدەرىنىڭ ۇلتتىق اقپارات تاراتۋ كورپوراسيالارى قاتىسادى. «EQUUS» دەرەكتى تريلوگياسىنىڭ رەجيسسەرى نايوبي تومپسوننىڭ الدىڭعى تاجىريبەسىنە سۇيەنەتىن بولساق، اتالمىش سەريال الەمنىڭ 50-دەن استام ەلىندە ميلليونداعان اۋديتوريا جينايدى دەپ كۇتىلۋدە.
وسى ورايدا، جوباداعى بىرلەسكەن ارىپتەستىك ارقاسىندا «قازاقستان» رترك» اق «Equus» دەرەكتى تريلوگياسىن كورسەتەتىن حالىقارالىق اقپارات تاراتۋشى دارەجەسىنە يە بولادى.
