8 اقپان كۇنى قىتايدان قازاق ەلىنە ورالۋ ماقساتىمەن كوشىپ كەلە جاتىپ، شقو زايسان اۋدانىنا قاراستى «مايقاپشاعاي» كەدەندىك باقىلاۋ بەكەتىندە 49،900 اقش دوللارى تاركىلەنگەن ءماۋىتحان گۇلجان ەسىمدى جەسىر انانىڭ ىسىنە قاتىستى سوت وتىرىسى 17 ناۋرىزدا وتەدى. بۇل تۋرالى  Baq.kz جازدى. 

قوعامدا زور داۋ تۋعىزعان بۇل وقيعادان سوڭ، 9 ناۋرىز كۇنى استانا قالاسىنداعى «نۇر وتان» پارتياسىنىڭ رەسپۋبليكالىق قوعامدىق قابىلداۋ بولىمىندە ق ر پارلامەنتى ءماجىلىسىنىڭ دەپۋتاتى باقىتگۇل حامەنوۆا قولىنان كەلگەنشە كومەكتەسەتىنىن ايتقان بولاتىن.

ايتا كەتەتىن ءبىر ءجايت، 17 ناۋرىز كۇنى وتەتىن سوت وتىرىسىنا تەك قانا ءماۋىتحان گۇلجاندى عانا شاقىرعان. جەسىر انانىڭ ۇلى مۇحتاش ۇلى ادىلبەككە حابارلاسقان شاقىرۋشىلار سوت وتىرىسىنا ءتوراعالىق ەتەتىن سۋديانىڭ ءاتى-جونىن ايتۋدان باس تارتىپتى.

ەلىمىزدەگى نەگىزگى اقپارات قۇرالدارى وسى جاعداي تۋرالى باستاما كوتەرىپ، abai.kz، qamshy.kz، 31.kz، azattyq.org جانە ت.ب. اقپارات قۇرالدارى ۇكىمەت باسشىسى ب.ساعىنتايەۆ پەن ق ر باس پروكۋرورى ج.اسانوۆتىڭ نازارىنا حات جازعان ەدى.

«ەلباسىمىز نۇرسۇلتان ءابىش ۇلىنىڭ ىزگى باستامالارىنىڭ ءبىرى – كوشى-قون ساياساتىن ارقا تۇتىپ، جۇڭگو ەلىنەن اتاجۇرتىم قازاقستانعا ءبىرجولا قونىس اۋدارىپ، كوشىپ كەلە جاتىپ، شەكارادان وسىنداي ۇلكەن كەدەرگىگە تاپ بولدىم. ءوزىم جۇرەك تالماسىمەن قاتتى اۋىرامىن. قانشا عۇمىرىم بارىن بىلمەيمىن، كوزىم ءتىرى كەزدە بالالارىمدى قازاق ەلىنە ورنالاستىرىپ، ۇرپاقتارىمنىڭ الاڭسىز ءومىر سۇرگەنىن كورسەم دەيمىن. كىشكەنتاي قىزىم مۇحتاش قىزى پەريزات استانا قالاسىنداعى №40 مەكتەپتە 6-سىنىپتا وقيدى»، – دەپ كوز جاسىن توكتى جەسىر انا.

«قازاقتىڭ جالعىز وتانى – قازاقستان» دەگەن بولاتىن ەلباسى نۇرسۇلتان نازاربايەۆ.

«قازاقستاننىڭ جەرى كەڭ، ەلى كەڭ. كەلىڭدەر دە اينالايىن قازاعىم، كۇنىڭدى كورىپ بايىڭدار!»

بۇل دا – ەلباسىنىڭ شەتەلدەگى قازاقتاردى اتاجۇرتقا شاقىرعان، دۇنيەجۇزى قازاقتارىنىڭ ءىى-شى قۇرىلتايىنداعى ءسوزى.