«قامشى» پورتالى الاش وردانىڭ 100 جىلدىعىنا وراي بيىلعا 5 ءىس-شارانى اتقارۋدى جوسپارلاعان. ونىڭ ەڭ ءبىرىنشىسى رەتىندە 2017 جىلى 5 ناۋرىزدا الماتىداعى ا.بايتۇرسىن ۇلى مۇراجاي-ۇيىندە الاش ارىستارىنىڭ رۋحىنا ارناپ اس بەرىلدى. ەندى «ءجۇز اعاش وتىرعىزۋ» اكسياسى باستالدى. بۇل شاراعا الماتى قالاسى اكىمشىلىگى قولداۋ كورسەتىپ وتىر. اتاپ ايتقاندا قالا ىشىنەن اعاش ەگۋگە لايىقتى جەر تەلىمى ۇسىنىلاتىن بولدى. وسىعان وراي ناۋرىز ايىنىڭ سوڭى مەن ءساۋىر ايىنىڭ باسىندا اعاش وتىرعىزاتىن جەر مەن ۋاقىت بەلگىلەنەدى. ازىرگە بەلگىلى بولعانداي، قالا ىشىندە جەمىس-جيدەك اعاشتارىن وتىرعىزۋعا تىيىم سالىنعان ەكەن. وتىرعىزىلاتىن اعاشتىڭ بيىكتىگى ءۇش مەتردەن كەم بولماۋى نەگىزگى شارتتاردىڭ ءبىرى. ونداي اعاشتىڭ ورتاشا باعاسى 7000-10000 تگ.كولەمىندە كورىنەدى.
«قامشى» پورتالى الاش ارىستارىنا ارنالعان بارلىق ءىس-شارانى حالىقتىق دەڭگەيدە وتكىزۋدى ءاۋ باستاعان حابارلاعان. سوندىقتان دا «100 اعاش وتىرعىزۋ» شاراسىنا كەز كەلگەن ادام قاتىسا الادى. 1000 اعاش وتىرعىزىپ جاتساق، تىپتەن قۇبا-قۇپ. وندا حالىقتىڭ ءوز كۇشىمەن «الاش اللەياسىن» جاساۋ ەش قيىندىق بولماس ەدى. ەگەر الاش ارىستارىنىڭ رۋحى ريزا بولسىن، ەرتەڭگى ۇرپاعىمىز سول اعاشتار ساياسىندا ەسىل ەرلەردىڭ ەڭبەگىن ەسكە السىن دەسەڭىز، وسى يگى شارادان قاپى قالماڭىز. نيەت بىلدىرگەن ازاماتتار ءوز اتى-جوندەرىمەن قوسا بايلانىس دەرەكتەرىن وسى ماتەريالدىڭ استىندا پىكىر رەتىندە جازىپ قالدىرۋعا بولادى. ال اتى-جوندەرىن جاريا ەتكىسى كەلمەگەن ازاماتتار «قامشى» پورتالىنىڭ qamshy@gmail.com ەلەكتروندى پوشتاسىنا جىبەرۋگە بولادى. شارانىڭ كۇنى، ۋاقىتى ناقتىلانعان كەزدە تىركەلۋگە ءوتىنىش بەرگەن ازاماتتارعا قوڭىراۋ شالىنىپ، ءمان-جاي حابارلانادى.
ءبىز الاش ارىستارىنىڭ وي ورمانىنان ءالى دە وتىن الىپ ءجۇرمىز... ال ءسىزدىڭ ۇرپاعىڭىز اكەسى ەككەن اعاشتىڭ اياسىندا ۇلى مۇراتىنا تامىزىق الاتىن بولسىن!
قۇرمەتپەن، «قامشى» پورتالىنىڭ رەداكسياسى.
