كەلەسى جىلدان باستاپ ايەلدەردىڭ زەينەت جاسى بىرتىندەپ كوتەرىلە باستايدى دەپ حابارلايدى «قامشى» پورتالى «Sputnik-كە» سىلتەمە جاساي وتىرىپ. وسىعان ءبىرىنشى بولىپ ىلىككەندەر، ياعني، 2018 جىلدىڭ ءبىرىنشى شىلدەسىنەن 58،5 جاسىندا زەينەتكە شىعاتىن  ايەلدەر زەينەتاقى كولەمىنەن ۇتاتىن بولادى، دەپ حابارلادى ق ر ەڭبەك جانە حالىقتى الەۋمەتتiك قورعاۋ مينيسترi تامارا دۇيسەنوۆا.  "2014 جىلى زەينەتاقى جۇيەسىن ودان ءارى جاڭعىرتۋ جونىندە كونسەپسيا، زاڭ دا قابىلداندى. 2018 جىلدىڭ ءبىرىنشى قاڭتارىنان باستاپ زەينەتاقى جاسىن كەزەڭ-كەزەڭىمەن ارتتىرۋ باستالادى. زەينەت جاسىن 63 جاسقا دەيىن جەتكىزۋدى ون جىل ىشىندە جۇرگىزەمىز. ول 2018 جىلدان 2028 جىلعا دەيىن جارتى جىلدان كوتەرىلىپ وتىرادى. ياعني ءبىزدىڭ ايەل ازاماتتارىمىز 2028 جىلى عانا 63 جاسقا كەلىپ زەينەتكە شىعاتىن بولادى"، — دەدى ۇكىمەتتە وتكەن باسپا ءسوز ءماسليحاتىندا دۇيسەنوۆا.وسىلايشا، كەلەسى جىلى ءبىرىنشى قاڭتاردا زەينەتكە شىعۋى ءتيىس ايەلدەر جارتى جىلدان كەيىن، ياعني ءبىرىنشى شىلدەدەن باستاپ شىعادى. ءمينيستردىڭ ايتۋىنشا، وسى ۋاقىتتا زەينەتكە شىعاتىن ايەلدەر قايتا ۇتادى ەكەن. دۇيسەنوۆا اتاپ وتكەندەي، بۇگىندە ەلىمىزدەگى زەينەتاقى  جۇيەسىنىڭ ءۇش قارجىلاندىرۋ كوزى بار. ال الەمدىك تاجىريبە كورسەتىپ وتىرعانداي، كوپدەڭگەيلى جۇيە تۇراقتى جانە جاقسى زەينەتاقى الۋعا مۇمكىندىك بەرەدى. "مەملەكەت بازالىق زەينەتاقىنى 2005 جىلدان باستاپ ەندىرىپ، تولەپ كەلەدى. ەكىنشىدەن، ازاماتتار وزدەرى دە زەينەتاقى جۇيەسىنە قاتىسۋى كەرەك. 1998 جىلدان باستاپ بارلىق جۇمىس ىستەيتىن ازاماتتار ءوز جالاقىسىنىڭ ون پايىزىن جيناقتاۋشى زەينەتاقى قورىنا  اۋدارادى. ۇشىنشىدەن، جۇمىس بەرۋشى 2020 جىلدان باستاپ زەينەتاقى جۇيەسىنە قوسىلىپ، ءوز قاراجاتى ەسەبىنەن بەس پايىز تولەيتىن بولادى"، — دەدى دۇيسەنوۆا.