الماتى قالاسى اكىمدىگىنىڭ ۇيىمداستىرۋىمەن 2017 جىلدىڭ 22 ناۋرىزىندا استانا الاڭى مەن اتلەتتەر اۋىلىندا «ناۋرىز مەرەكەسى» تويلانادى.
استانا الاڭىنا كيىز ۇيلەر، ءار ءتۇرلى قوستار، شاتىرلار تىگىلىپ، ناۋرىز تاقىرىبىنا وراي جاسالعان ينستاللياسيالار ورناتىلادى. مەرەكەدە «مۇشەل» اتتى تەاترلاندىرىلعان كورىنىس كورسەتىلىپ، قازاقتىڭ كونەدەن كەلە جاتقان « سامالىق»، «تۇلىك جىرى» اتتى ءسالت-داستۇرلى، ريتۋالدى ءان-جىرلارى ورىندالادى.
مەرەكەلىك قويىلىم وتەتىن الاڭ ءبىرتۇتاس ساحنالىق كەڭىستىك پرينسيپىمەن بەزەندىرىلەدى. بارلىق مەرەكەلىك ءىس-شارالار، ءان-بي، تەاترلاندىرىلعان قويىلىم كبتۋ عيماراتىنىڭ الدىنا جينالعان بۇكىل جۇرتشىلىق بىردەي كورەتىن ساحنادا وتەدى.
ال اتلەتتەر اۋىلىنداعى مەرەكەلىك قويىلىم وتەتىن الاڭ تۇتاستاي جاڭا قونىستانعان قازاق اۋىلىن ەلەستەتەدى. الاڭنىڭ كىرەبەرىسىنە ەجەلگى ۇلگىدەگى قاقپا ورناتىلىپ، ونىڭ ەكى جاق شەتىنە كونە كۇيمە ۇستىنە تىگىلگەن 2 كيىز ءۇي قويىلادى.
مەرەكە وتەتىن الاڭعا «شامدال»، «قوس»، «كونە ساۋدا اربالارى»، «تاڭبالى تاستار»، «تاريح تەگەرشىگى» اتتى ينستاللياسيالار جانە ۇلتتىق نىشانداعى ءار ءتۇرلى مۇسىندەر قويىلادى.
«ۇلىستىڭ ۇلى كۇنى» مەرەكەسىندە رامازان ستامعازييەۆ، نۇرجان جانپەيىسوۆ، تىلەۋلەس قۇرمانعالييەۆ، ەركىن شۇكىمان، ايگۇل قوسانوۆا سىندى قازاقتىڭ تانىمال انشىلەرى، ن. تىلەندييەۆ اتىنداعى «وتىرار سازى» فولكلورلىق-ەتنوگرافيالىق وركەسترى، «قوڭىر»، «مۋزارت»، «الاش ۇلى» توپتارى، ايقىن، ءالي وقاپوۆ،ءمولدىر اۋەلبەكوۆا، مارجان اراپبايەۆا سياقتى تانىمال ەسترادا جۇلدىزدارى ونەر كورسەتەدى.
