"قامشى" پورتالى كۇنى كەشە عانا ارمان سقابىل ۇلىنىڭ شۋ تۋدىرعان ماتەريالىن وقىرمان نازارىنا ۇسىنعان سايتتاردىڭ ءبىرى. "ءبىراز وقىرمانىم جەكەگە جازىپ، جۋرناليست ارمان سقابىل ۇلىنىڭ "NUR.KZ" پورتالىنا بەرگەن بۇگىنگى سۇحباتىنا بايلانىستى وي-پىكىرىمدى سۇراپتى" دەپ ءوزىنىڭ فەيسبۋك پاراقشاسىندا جازبا قالدىرعان تانىمال تەلەجۋرناليست سەرىك اباس-شاحتىڭ پىكىرىن جاريالاماساق وقىرمان ءبىزدى كەشىرمەس.
"1.ارمان - جاقىن دوسىم، كۋرستاسىم. ءبىراق، ول تاۋەلسىز جۋرناليست. ونىڭ دا وزىندىك ۇستانىمى بار. سۇxباتتا ايتىلعان جايتتەر ءوز ارامىزدا ونسىز دا ءجيى تالقىلانىپ جۇرگەن-دى. ءجيى داۋلاساتىنىمىزدى جاسىرمايمىن. سوندىقتان، پروبلەمالاردى ەل الدىنا جايىپ سالعان بۇگىنگى اڭگىمەسىنە ونشا تاڭدانبادىم. ءبىراق، اتالمىش جازبانىڭ ەلگە تانىمال سايتتا جاريا كورگەنىنە ازداپ قىنجىلاتىنىمدى جاسىرمايمىن. بۇرىن "قوي-قويعا قويا سالاتىن" دوسىمنىڭ "اشۋىنا تيگەن ءبىر سەبەپ بار، ايتەۋىر (ءوز ايتۋىنشا). قالاي بولعاندا دا، ارەكەڭنىڭ اششىلاۋ ايتقان سىن-پىكىرىن، ارىپتەس دوسىمنىڭ جاناشىرلىق نازى دەپ قابىلدايمىن.
3. جۇمىس اۋقىمى وتە ۇلكەن مەكەمەگە ەرلان قارين مىرزانىڭ ءتوراعا بولىپ كەلگەنىنە كوپ ۋاقىت بولعان جوق. ەرەكەڭ كەلە سالىسىمەن اق، كورپوراسياداعى بارلىق كەمشىلىك جويىلىپ، جۇمىستىڭ ءبارى تۇزەلە قالادى دەپ بوسقا ۇمىتتەنبەڭىز. از ۋاقىت ىشىندە، قارين تۇگىل ماسكەۋلىك تەلەبەساسپاپ كوستيا ەرنەستىڭ ءوزى دە توڭكەرىس جاساي الماسى انىق. بۇل ۇزاق ءارى اۋقىمدى پروسەسس.
3.ەرلان قارين وزىمەن بىرگە ۇلتتىق ارناعا دا، "بالاپانعا" دا، "KAZsport-قا" دا جاڭا كوماندا الىپ كەلگەن جوق (بۇگىنگە دەيىن وسىلاي، ايتەۋىر). تەلەونىم يەلەرىنىڭ ءبارى دەرلىك - وسى قارا شاڭىراقتىڭ استىندا قىزمەت ىستەپ جۇرگەن جاستار. اۋتسورسينگتىك ستۋديالارعا تاپسىرىس بەرۋ جۇمىستارى ەندى عانا باستالۋدا. سوندىقتان، جاڭا ءتوراعا بىلەك سىبانا ىسكە كىرىسسە دە، "قازاقستاندىقتاردىڭ" شابىتى شارىقتاپ، "شەديەۆر تەلەونىمدەر كونۆەيەرى" ىسكە قوسىلىپ كەتپەدى. جاڭا باسشىمىزدىڭ ۇلى وزگەرىس جاساي سالاتىن سيقىرشىلىعى جوق. اينالدىرعان وتىز بەس كۇن ىشىندە رەفورما جاساپ ۇلگەرمەيسىز.
4."قازاقستان" كورپوراسياسى جەر بەتىنەن قاشىقتا ۇشىپ جۇرگەن بولەك عالامشار ەمەس. بۇل دا وسى قوعامنىڭ ءبىر بولشەگى ەكەنىن ۇمىتپايىق. مۇندا دا "كۇن" بار، مۇندا دا "كولەڭكە" بار. مۇندا دا "كوكەشكىلەر" قوڭىراۋى ءجيى ەستىلىپ تۇرادى. مۇندا دا مايتالمان مامانداردىڭ تاپشىلىعى ايقىن سەزىلەدى. پروبلەمالاردىڭ ءبارىن ەدەن بەتىندەگى شاڭ-توزاڭ سياقتى تەز سىپىرىپ تاستاي المايسىز. جاڭا باسشىلىققا ازداپ بولسا دا ۋاقىت بەرىڭىزدەر. وزگەرىس جاساۋعا ءبارى مۇددەلى"
