نۇرتاس ادامبايدىڭ الەۋمەتتىك جەلى پاراقشاسىندا جازىلعان پىكىرىن «قامشى» پورتالى قازاقشا نۇسقادا جاريالاعان بولاتىن. سوڭعى كەزدەرى اينالاسىنان داۋ ارىلماي جۇرگەن مەگا جۇلدىزداردىڭ ءبىرى نۇرتاس ادامبايعا الەۋمەتتىك جەلى قولدانۋشىلارىنىڭ تاراپىنان ءبىراز سىني پىكىرلەر ايتىلىپ ءجۇر. ولاردىڭ باسىم كوپشىلىگى قازاق تىلىنە قاتىستى، ياعني «نەگە قازاقشا سويلەمەيسىڭ؟» نەمەسە «نەگە قازاق تىلىندە جازبايسىڭ؟» دەگەن سياقتى سۇراقتار قويىلىپ جاتىر. اتالمىش ماسەلەگە قاتىستى نۇرتاس ادامباي ءوزىنىڭ الەۋمەتتىك جەلى پاراقشاسىندا ارنايى پوست جازىپ قالدىرعان بولاتىن، الايدا ورىس تىلىندە. وزىنە قاراتىلىپ ايتىلىپ جاتقان سىني پىكىرلەرگە اكتەر جاۋاپ بەرەمىن دەپ، باسى تاعى دا داۋعا قالعانى بەلگىلى بولدى. ەندەگى كەزەك تە نۇرتاس ادامباي حالىققا دەگەن ءوز ۇندەۋىن ۆيدەو ارقىلى جولداپ وتىر.
«قۇرمەتتى دوستار، بارىڭە سالەم! مەنىڭ ءتىل تۋرالى جازعان پوستىمدى دۇرىس تۇسىنبەگەندەرگە تۇسىندىرگىم كەلەدى. مەنىڭ ويىمشا ءاربىر ازامات ءوزىنىڭ مەملەكەتتىك ءتىلىن ءبىلۋى قاجەت. قازاقستاندا ول – قازاق ءتىلى. ءاربىر ادام ءوز انا ءتىلىن ءبىلۋى قاجەت. ءبىراق قازاق ءتىلىن بىلمەيتىن ادامداردى، وكىنىشكە وراي، تومەندەتۋ دۇرىس ەمەس دەپ ويلايمىن. قازاق حالقىن «تازا قازاق»، «شالا قازاق» دەپ ءبولۋدىڭ قاجەتى جوق. ويتكەنى ول ءبىزدىڭ مەملەكەتىمىزگە ۇلكەن زيانىن تيگىزۋى مۇمكىن. قازاق حالقى ءارقاشان بىرلىكتە بولۋ كەرەك. مەن قازاق ءتىلىن جەتىك مەڭگەرمەسەم دە، قازىگى تاڭدا بارىنشا جەتىك مەڭگەرۋگە تىرىسىپ جاتىرمىن جانە باسقالاردى دا قازاق ءتىلىن جاقسى مەڭگەرۋگە شاقىرامىن. ارينە، ءوز ەركىلەرىمەن»، - دەيدى ەلىمىزگە بەلگىلى اكتەر، رەجيسسەر نۇرتاس ادامباي.
