وتكەن اپتادا رەسەيدىڭ لەنينگراد وبلىسى پريوزەرسك قالاسىندا ويناپ جۇرگەن بالانى دجيپىمەن سوعىپ، تىزەرلەتىپ وتىرعىزىپ قويىپ تاربيەلەمەك بولعان رەسەيلىك بيزنەسمەننىڭ ارەكەتى جۇرتتىڭ جاعاسىن ۇستاتتى. ءقازىر بۇل ماسەلە دۋماداعىلاردىڭ قۇلاعىنا جەتىپ، قىزۋ تالقىعا ءتۇستى، دەپ حابارلايدى Baq.kz.
وقيعا 9 ناۋرىزدا ورىن العان. جول جيەگىندە ەكى ءبۇلدىرشىن ويىنشىق قارۋدى وتكەن-كەتكەن كولىكتەرگە كەزەنىپ، پلاستيك وق اتقان. كەنەتتەن جۇيىتكىپ كەلە جاتقان قارا دجيپتەگى ەر ادام بالالاردىڭ ارەكەتىنە اشۋلانىپ، جول ەرەجەسىن بۇزا-مۇزا، كەرى بۇرىلىپ، ولاردى قۋا جونەلەدى. قوس بالانىڭ ەرەسەكتەۋى كىشىسىن ۇيگە قاراي قۋىپ، ءوزى وڭعا قاراي جۇگىرەدى. دجيپتەگى ەر ازامات قارشاداي بالانى قۋىپ جەتكەنىمەن قويماي، سوعىپ قۇلاتادى. ول ازداي، كولىگىنەن شىعىپ، بالانى قاردىڭ ۇستىنە تىزەرلەتىپ وتىرعىزىپ قويىپ، «تارتىپكە سالادى». اشۋىن شىعارىپ بولعان سوڭ، وقيعا ورنىنا ءتارتىپ ساقشىلارىن شاقىرعان.
كەلىپ تۇسكەن قوڭىراۋ بويىنشا وقيعا ورنىنا جەتكەن پوليسەيلەر ءىستىڭ ءمان-جايىن تەكسەرمەستەن جۇرگىزۋشىنى جىبەرە سالعان. ءدال سول كۇنى بالانىڭ جاراقات الىپ، ءتارتىپ ساقشىلارى ءتيىستى شارا قولدانباعالى جايلى تەلەحابارلاما تۇسەدى. سوندىقتان وسى قىلمىستىق ءىستى قاراستىرۋ بارىسىندا پوليسەيلەردىڭ ارەكەتى دە ءجىتى تەكسەرىلەتىن بولادى.
بالانى قۇقىق قورعاۋشىلاردىڭ قولىنا تاپسىرعان سوڭ وقيعا ورنىنان تايىپ تۇرعان دجيپ يەسى كىناسىن مويىنداپ، پوليسياعا ءوز ەركىمەن بەرىلۋدىڭ ورنىنا، ءبىرقاتار باق-قا سۇحبات بەرىپ، وسى ارەكەتىمەن بالانى تاربيەلەمەك بولعانىن ايتىپ اقتالدى. ءتىپتى، جول جيەگىنە ويناتىپ قويعان اتا-اناسىن ايىپقا الدى. دەسە دە، ەر ادامنىڭ بالانى قورلاعان قاتىگەز ارەكەتى كوشەدەگى ۆيدەوكامەرالاردىڭ بىرىنە ءتۇسىپ قالعان.
رەسەي تەرگەۋ كوميتەتىنىڭ باسشىسى كىنالى ەر ازاماتتى قاماۋعا الۋ تۋرالى بۇيرىق بەرەدى. كەشە كۇدىكتى قولعا ءتۇستى. ول جەرگىلىكتى تانىمال كاسىپكەرلەردىڭ ءبىرى ۆلاديمير بەلسكيي بولىپ شىقتى. ونىڭ ۇستىنەن بۇزاقىلىق تۋرالى قىلمىستىق ءىس قوزعالعدى.
ەندى بۇل داۋ دۋماداعى دەپۋتاتتاردىڭ قۇلاعىنا جەتكەن. وسى ماسەلەنى تالقىعا شىعارعان دەپۋتات يرينا ياروۆا بۇل ىسكە تەرگەۋ كوميتەتىمەن بىرگە باس پروكۋراتۋرانىڭ دا ارالاسۋىن سۇرادى. ونىڭ ايتۋىنشا، بالانىڭ بالالىق ارەكەتىنە سونشالىقتى اشۋلانعان ادامنىڭ اقىل-ەسى ءتۇزۋ ەمەس.
«ونىڭ بۇل ارەكەتىن بۇزاقىلىق دەپ قانا ەمەس، بالانىڭ دەنساۋلىعىنا ءقاۋىپ توندىرگەن قاستاندىق دەپ باعالاۋ كەرەك»، - دەدى دەپۋتات.
باس پروكۋراتۋرا مەن تەرگەۋ كوميتەتىنە جولدانعان دەپۋتاتتىڭ ساۋالىن مەمدۋمانىڭ سپيكەرى ۆياچەسلاۆ ۆولودين دە قولدادى.
«بالالارىمىزدى باسىپ جاتقاندا، سىزدەر مەن بىزدەر قۇر قاراپ وتىرماۋىمىز كەرەك. بۇل ءبىزدىڭ بالالارىمىز»، - دەدى سپيكەر.
